குமாரபாளையம் பவர்ஹவுஸ் மின்மாற்றி அருகே திடீர் தீ விபத்து

குமாரபாளையம் சேலம் சாலையில் அமைந்துள்ள பவர் ஹவுஸ் மின்மாற்றியின் பக்கவாட்டில் தீ விபத்து ஏற்பட்டது.

குமாரபாளையம் சேலம் சாலையில் குளத்துகாடு பகுதியில் பவர் ஹவுஸ் அமைந்துள்ளது/ இதன் வெளிப்புறமாக மின்மாற்றி ஒன்று அமைக்கப்பட்டுள்ளது. இந்த மின்மாற்றியின் கீழ் பகுதியில் அப்பகுதியில் வசிக்கும் பொதுமக்கள் குப்பைகளை கொட்டுவது வழக்கமாக கொண்டுள்ளனர்.

இந்நிலையில் நேற்றுமுன்தினம் இரவு 10 மணியளவில் குப்பையில் ஏற்பட்ட தீ மளமளவென பரவி, மின் மாற்றியை சுற்றிலும் எரிந்தது. இதனால் மின்மாற்றி முழுவதும் தீயில் எரிந்து மிகப்பெரிய விபத்துக்கு உள்ளாகும் நிலை ஏற்பட்டது. இதனையடுத்து அப்பகுதி மக்கள் குமாரபாளையம் தீயணைப்பு துறையினருக்கு கொடுத்த தகவலின் பேரில், தீ விபத்து நடைபெற்ற இடத்திற்கு விரைந்து சென்ற குமாரபாளையம் தீயணைப்பு துறையினர் சுமார் 2 மணி நேரத்திற்கு மேலாக போராடி தீயை அணைத்து மிகப்பெரிய விபத்தினை தடுத்தனர்.

குமாரபாளையம் தீயணைப்பு துறை சார்பில் விழிப்புணர்வு செயல்முறை விளக்க முகாம் நிலைய அலுவலர் ஜெயச்சந்திரன் தலைமையில் நடந்தது. இதில் தீ விபத்து ஏற்பட்டால், அதிலிருந்து பாதிக்கப்பட்ட நபரை மீட்பது எப்படி, கட்டிட இடிபாடுகளுக்குள் சிக்கிய நபரை மீட்பது எப்படி, கேஸ் சிலிண்டர் கையாளும் முறை, ஆறு, ஏரி, கிணறு ஆகிய நீர் நிலைகளில் மூழ்கிய நபரை மீட்பது, ஆற்று வெள்ளத்தில் அடித்து செல்வோரை மீட்பது, உள்ளிட்ட பல்வேறு சம்பவங்களில் தீயணைப்பு படையினர் செயல்பாடுகள் குறித்து செயல்முறை விளக்கம் செய்து காண்பிக்கப்பட்டது. இதில் பொதுமக்கள், மாணவ, மாணவியர் பெருமளவில் பங்கேற்று பயன் பெற்றனர்.

தீயணைப்பு நிலையம் சார்பில் தீத்தொண்டு வாரம் கடைபிடிக்கப்பட்டு வருகிறது. தீயணைப்பு படையினர் பணியின் போது உயிரிழந்தவர்களுக்கு மலரஞ்சலி செலுத்தும் நிகழ்வு ஆண்டுதோறும் நடத்தப்பட்டு வருகிறது. இந்த நிகழ்வு குமாரபாளையம் தீயணைப்பு நிலையத்தில் நடைபெற்றது. மாநில அளவில் தீயணைப்பு பணியின் போது உயிரிழந்தவர்கள் பெயர் பட்டியலுடன், தீயணைப்பு வீரர் போல் உருவ பொம்மை அருகே வைக்கப்பட்டிருந்தது. நிலைய அலுவலர் மற்றும் மற்ற தீயணைப்பு படையினர் மலர் வளையம் வைத்து, மலரஞ்சலி செலுத்தியதுடன், இரண்டு நிமிடம் மவுன அஞ்சலி செலுத்தினர்.

இதன் ஒரு கட்டமாக தீயணைப்பு மற்றும் மீட்பு படையினர் சார்பில் தீத்தொண்டு நாள் விழிப்புணர்வு பேரணி நகராட்சி அலுவலகம் முன்பு துவங்கி, முக்கிய சாலைகளின் வழியாக சென்று பள்ளிபாளையம் சாலையில் உள்ள தீயணைப்பு படையினர் அலுவலகத்தில் நிறைவு பெற்றது. பேரணியை நகராட்சி ஆணையாளர் (பொ) ராஜேந்திரன் கொடியசைத்து துவக்கி வைத்தார். ராகவேந்திரா பாலிடெக்னிக் கல்லூரி மாணவர்கள் விழிப்புணர்வு பதாதைகள் ஏந்தியவாறும், கோஷங்கள் போட்டவாறும், துண்டு பிரசுரங்கள் விநியோகம் செய்தவாறும் பேரணியில் சென்றனர். கல்லூரி முதல்வர் விஜயகுமார் உள்ளிட்ட பலர் பங்கேற்றனர்.