குமாரபாளையம் நகராட்சி கமிஷனருக்கு பிரிவு உபசார விழா

குமாரபாளையம் நகராட்சி கமிஷனர் ஸ்டான்லிபாபு பணியில் சேர்ந்து 23 மாதங்கள் ஆன நிலையில், தற்போது பதவி உயர்வு பெற்று கிரேடு 1 வாணியம்பாடி நகராட்சி கமிஷனராக மாறுதல் செய்யப்பட்டுள்ளார்.

வேலூர் மாவட்டம், பேரணாம்பட்டு நகராட்சி கமிஷனர் சசிகலா குமாரபாளையம் நகராட்சி கமிஷனராக பொறுப்பேற்கவுள்ளார். நகராட்சி அலுவலகத்தில் கமிஷனர் ஸ்டான்லிபாபுவிற்கு பிரிவு உபசார விழா பொறியாளர் ராஜேந்திரன் தலைமையில் நடைபெற்றது.

நகராட்சி அலுவலர்கள், தூய்மை பணியாளர்கள், டி.பி.சி. பணியாளர்கள் எனப்படும் மலேரியா, டெங்கு பணியாளர்கள் உள்ளிட்ட பலரும் மாலைகள் அணிவித்தும், சால்வை அணிவித்தும், நினைவு பரிசு வழங்கியும், வாழ்த்தினார்கள்.

டி.பி.சி. பணியாளர்கள் கூறுகையில், கமிஷனர் எங்களை மிகவும் அன்பாக எங்கள் தந்தையை போல் வழி நடத்தினார். அவரது பணிக்காலம் குமாரபாளையம் நகராட்சியின் பொற்காலம் என அவர்கள் தெரிவித்தனர்.

சுகாதார அலுவலர் ராமமூர்த்தி, எஸ்.ஐ.-க்கள் செல்வராஜ், சவுந்தரராஜ், மேலாளர் சண்முகம், ஓவர்சீர் சந்தோஷ், ஆர்.ஐ.கோபால், உள்ளிட்ட பலரும் பங்கேற்றனர்.