ஈரோடு: வயதான தம்பதி மீது மோட்டார் சைக்கிளில் மோதிய கூலி தொழிலாளி பலி

ஈரோடு கஸ்பாபேட்டை பகுதியைச் சேர்ந்தவர் விஜய் (29). இவர் கூலி தொழிலாளி. இவருக்கு இன்னும் திருமணம் ஆகவில்லை. இந்நிலையில் சம்பவத்தன்று விஜய் தனது மோட்டார் சைக்கிளில் சென்று கொண்டிருந்தார். அப்போது ஈரோடு இ. வி. என் சாலையில் சென்று கொண்டிருந்தபோது சாலையை கடக்க முயன்ற நத்தகாடையூர், பழைய கோட்டையைச் சேர்ந்த சுப்ரமணி (65), அவரது மனைவி பர்வதம் (60) ஆகியோர் மீது விஜய் ஓட்டி வந்த மோட்டார் சைக்கிள் மோதியது.

காயமடைந்தோர்

இதில் சுப்பிரமணிக்கு லேசான சிராய்ப்பு காயம் ஏற்பட்டது. பர்வதத்துக்கு வலது காலில் எலும்பு முறிவு ஏற்பட்டது. அதே சமயம் விபத்தில் தடுமாறி விழுந்த விஜயின் தலையில் பலத்த காயம் ஏற்பட்டது.

சமூக வலைத்தளங்களில் வைரல்

இந்த விபத்து காட்சி சமூக வலைத்தளங்களில் வெளியாகி வைரலானது.

மருத்துவமனையில் அனுமதி

படுகாயம் அடைந்த விஜய்யை மேல் சிகிச்சைக்காக சேலம் மருத்துவ கல்லூரி மருத்துவமனைக்கு அனுப்பி வைத்தனர். இந்நிலையில் சிகிச்சை பலனின்றி விஜய் பரிதாபமாக இறந்தார்.

போலீசார் விசாரணை

இது குறித்து ஈரோடு அரசு தலைமை மருத்துவமனை போலீசார் வழக்கு பதிவு செய்து விசாரணை நடத்தி வருகின்றனர்.