எடப்பாடி பழனிசாமி உறவினர்களின் நிறுவனங்களில் வருமான வரித்துறை சோதனை தீவிரம்

முன்னாள் முதல்வர் எடப்பாடி கே. பழனிசாமியின் உறவினர்களுக்கு சொந்தமான நிறுவனங்களில் வருமான வரித்துறை அதிகாரிகள் மூன்றாவது நாளாக சோதனை நடத்தி வருகின்றனர். ஈரோடு செட்டிபாளையம், தெற்கு ஸ்டேட் வங்கி நகரில் அமைந்துள்ள எடப்பாடி பழனிசாமியின் உறவினர் என்.ராமலிங்கம் என்பவருக்கு சொந்தமான கட்டுமான நிறுவனத்தில் செவ்வாய்க்கிழமை தொடங்கிய சோதனை தொடர்ந்து நடைபெற்று வருகிறது.

கோவையில் இருந்து வந்த 10க்கும் மேற்பட்ட வருமான வரித்துறை அதிகாரிகள் ஈரோட்டில் உள்ள அந்நிறுவனத்தின் தலைமை அலுவலகம் மற்றும் கஸ்பாபேட்டையில் உள்ள ராமலிங்கத்தின் வீட்டிலும் சோதனை நடத்தி வருகின்றனர். இதேபோல சென்னையில் தேனாம்பேட்டை, பூக்கடை, திருவொற்றியூர், சாத்தங்காடு உள்ளிட்ட பகுதிகளில் அமைந்துள்ள கட்டுமானம் மற்றும் மெட்டல் நிறுவனங்களுக்கு சொந்தமான 6க்கும் மேற்பட்ட இடங்களிலும் வருமான வரித்துறையினரின் சோதனை தொடர்ந்து நடைபெற்று வருகிறது. இந்த சோதனைகள் தொடர்பாக வருமான வரித்துறை அதிகாரிகள் எந்த அதிகாரப்பூர்வ தகவலும் வெளியிடவில்லை என்பது குறிப்பிடத்தக்கது. வரித்துறை அதிகாரிகள் சோதனைகளின் போது சில முக்கிய ஆவணங்களை கைப்பற்றியதாக தகவல்கள் வெளியாகி உள்ளன.

இதனால் இந்த சோதனையின் முடிவில் பல முக்கிய தகவல்கள் வெளியாகலாம் என எதிர்பார்க்கப்படுகிறது. இந்த சோதனை அடுத்த சில நாட்கள் தொடரும் என கூறப்படுகிறது. சோதனையின் போது வரித்துறை அதிகாரிகள் கணக்கு புத்தகங்கள், கம்ப்யூட்டர்கள் மற்றும் முக்கிய ஆவணங்களை ஆய்வு செய்து வருகின்றனர். மேலும் நிறுவனத்தின் வங்கி கணக்குகள், பண பரிவர்த்தனைகள் குறித்தும் விரிவான ஆய்வு மேற்கொள்ளப்பட்டு வருவதாக தெரிகிறது. சோதனை முடிவில் முக்கிய தகவல்கள் வெளியாகும் என எதிர்பார்க்கப்படுகிறது.