குடிநீர் தட்டுப்பாட்டால் வெடித்த மக்கள் கோபம்

சத்தியமங்கலம் பகுதியில் குடிநீர் தட்டுப்பாடு – மக்கள் மறியல்

சத்தியமங்கலம் அருகே உள்ள ராஜன்நகர் ஊராட்சியின் கஸ்தூரி நகரில் குடிநீர் விநியோகம் குறைவாக இருப்பதால், மக்கள் கடும் அவதிக்குள்ளாகி வருகின்றனர். 50க்கும் மேற்பட்ட குடும்பங்கள் வசிக்கும் இந்த பகுதியில் நீண்ட நாட்களாக குடிநீர் பற்றாக்குறை நீடித்ததால், நேற்று காலை 60க்கும் மேற்பட்டோர் ராஜன்நகர்-பவானிசாகர் சாலையில் மறியலில் ஈடுபட்டனர். தகவல் அறிந்த சத்தியமங்கலம் வட்டார வளர்ச்சி அலுவலர்கள் மற்றும் போலீசார் மக்கள் போராட்டத்திற்கு இடையூறாகச் சென்று, பேச்சுவார்த்தை நடத்தினர். அதிகாரிகளின் சமரச முயற்சியால், மறியலை கைவிட்ட மக்கள் வீடு திரும்பினர். இதனால் சுமார் 20 நிமிடங்களுக்கு போக்குவரத்து பாதிக்கப்பட்டது.

அதேபோல், தாளவாடி பகுதியில் உள்ள நேதாஜி சர்கிள் பகுதியிலும் குடிநீர் விநியோகம் ஒரு வாரமாக முழுமையாக துண்டிக்கப்பட்டிருந்தது. இது குறித்து ஊராட்சி அலுவலர்களிடம் பலமுறை புகார் தெரிவித்தும் எந்த நடவடிக்கையும் எடுக்கப்படாததால், 40க்கும் மேற்பட்ட மக்கள் காலி குடங்களுடன் சாலை மறியலில் ஈடுபட்டனர். இதே சமயத்தில், தாளவாடியில் மாவட்ட நிர்வாகம் சார்பில் 'உங்களை தேடி உங்கள் ஊரில்' திட்ட முகாம் நடைபெற்றுக்கொண்டு இருந்தது. இதில் கலெக்டர் உள்ளிட்ட பல்வேறு உயரதிகாரிகள் பங்கேற்றிருந்த நிலையில், பொதுமக்கள் மறியலில் ஈடுபட்டதால், அதிகாரிகள் பெரும் அவதிக்குள்ளாகினர். பின்னர், தாளவாடி வட்டார வளர்ச்சி அலுவலர்கள் விரைந்து வந்தனர். மக்களுடன் பேச்சுவார்த்தை நடத்தி, விரைவில் தீர்வு காணப்படும் என்று உறுதி அளித்ததையடுத்து, மறியல் கைவிடப்பட்டது.