ஜி.எஸ்.டி. எண்ணில் 1.80 கோடி மோசடி

ஈரோடு: தனது ஜி.எஸ்.டி. எண்ணைப் பயன்படுத்தி 1.80 கோடி ரூபாய்க்கு தவறான பில்லிங் செய்ததாக ஆடிட்டர் மீது நடவடிக்கை எடுக்க வேண்டும் என ஒரு வாலிபர் புகார் அளித்துள்ளார்.

வடமுகம் வெள்ளோட்டை சேர்ந்த முருகானந்தம் (36) என்பவர், 2017ஆம் ஆண்டு எம்.எஸ். எலக்ட்ரானிக்ஸ் என்ற பெயரில் கடை தொடங்கி, ஜி.எஸ்.டி. எண் பெற்றிருந்தார். தொழில் நஷ்டமடைந்ததால், 2021ஆம் ஆண்டு கடையை மூடிவிட்டு, தனது ஜி.எஸ்.டி. எண்ணை ரத்து செய்ய ஆலோசகர் உதயகுமாரிடம் வேண்டுகோள் வைத்தார்.

2022 ஆம் ஆண்டு டிசம்பரில், ஜி.எஸ்.டி. ரத்து செய்ய கோரியதாக குறுஞ்செய்தி வந்ததால், அது விரைவில் நிறைவேற்றப்படும் என்ற நம்பிக்கையில் இருந்தார். ஆனால், 2023 ஆம் ஆண்டு ஜூனில் கரூர் வணிக வரித்துறையிலிருந்து வரி பாக்கி செலுத்த வேண்டும் என கடிதம் வந்தது. ஆங்கிலத்தில் இருந்த அந்த அறிக்கையை ஆடிட்டரிடம் காட்டிய போது, ஜி.எஸ்.டி. ரத்து செய்யப்பட்டது என்று அவர் தெரிவித்தார்.

கடிதம் வந்ததற்குப் பிறகு, 2023 ஆம் ஆண்டு ஆகஸ்டில், கரூர் வணிக வரித்துறை அலுவலகத்திலிருந்து அவருக்கு அழைப்பு வந்து, நேரில் வரி பாக்கியை செலுத்துமாறு அறிவுறுத்தப்பட்டது. அதன்பின், முருகானந்தம், தனது ஜி.எஸ்.டி. எண்ணை பயன்படுத்தி தவறான பில்லிங் செய்யப்பட்டதாகக் கருதி, ஆடிட்டர் மீது உரிய நடவடிக்கை எடுக்க வேண்டும் என ஈரோடு எஸ்.பி. அலுவலகத்தில் புகார் அளித்துள்ளார்.