ஆட்சியர் அலுவலகம் முன்பு குடும்பத்துடன் போராட்டத்தில் ஈடுபட்ட பெண்

தர்மபுரி மாவட்டம் செட்டிக்கரை அருகேயுள்ள பள்ளக்கொல்லை கிராமத்தை சேர்ந்தவர் சின்னசாமி. இவரது மனைவி சரோஜா. இவர் தனது குடும்பத்தினருடன் இன்று காலை 11 மணியளவில் தர்மபுரி ஆட்சியர் அலுவலகத்திற்கு வந்தார்.

அப்போது திடீரென்று ஆட்சியர் அலுவலக வளாகத்தில் தனது குடும்பத்தினருடன் போராட்டத்தில் ஈடுப்பட்டார். அங்கு பாதுகாப்பு பணியில் ஈடுபட்டு இருந்த காவல்துறையினர்அவர்களிடம் விசாரித்தனர்.

அப்போது சரோஜா மற்றும் அவரது குடும்பத்தினர் கூறுகையில், தர்மபுரி மாவட்டம் விருப்பாட்சிபுரம் அருகேயுள்ள கோடிகொட்டாய் கிராமத்தை சேர்ந்தவர் எனது தந்தை பெருமாள். என்னை பள்ளக் கொல்லையைச் சேர்ந்த சின்னசாமி என்பவருக்கு திருமணம் செய்து கொடுத்தனர். என் தந்தைக்கு 3 மகன்களும் 2 மகள்களும் வாரிசுதாரர்கள். இதில் தந்தை பெருமாள், தாய் ராஜம்மாள், அண்ணன் பச்சியப்பன் மற்றும் அக்கா ராணி ஆகியோர் இறந்து விட்டனர்.

இந்நிலையில் குடு்ம்ப சொத்தை அபகரிக்க வேண்டும் என்று ஆசை கொண்ட எனது தம்பிகள் மாதையன், மாரிமுத்து, மற்றும் அண்ணன் குடும்பத்தை சேர்ந்தவர்கள் போலியாக வாரிசு சான்று தயாரித்து தந்தை பெயரில் உள்ள குடும்ப சொத்தை 5 பத்திரங்களாக பதிவு செய்து உள்ளனர்.

என்னையும், இறந்து போன தனது அக்கா ராணியை தவிர்த்து விட்டு என் தந்தைக்கு 3 மகன்கள் தான் உள்ளனர் என்று போலியாக வாரிசு சான்று பெற்று உள்ளனர். அதன் மூலம் எங்களது சொத்துகளை விற்றுவிட்டனர்.

ஆகவே போலியான சான்று மூலம் குடும்ப சொத்தை அபகரித்து இருக்கும் எனது தம்பிகள் மற்றும் அண்ணன் குடும்பத்தினர் மீது உரிய நடவடிக்கை எடுக்க வேண்டும் என்று வட்டாட்சியார் மற்றும் அதிகாரிகளிடம் பலமுறை புகார் மனு அளித்தும் உரிய நடவடிக்கை எடுக்கவில்லை.

எனவே, போலி வாரிசு சான்று மூலம் சொத்தை அபகரித்த சகோதரர்கள், அண்ணன் குடும்பத்தினர், போலி வாரிசு சான்று வழங்கிய அதிகாரிகள் ஆகியோர் மீது நடவடிக்கை எடுக்காததை கண்டித்து போராட்டத்தில் ஈடுபடுவதாக தெரிவித்தனர்.

இது குறித்து காவல்துறையினர் போராட்டத்தில் ஈடுபட்டவர்களிடம் பேச்சு வார்த்தை நடத்தினர். பின்னர் அவர்களை ஆட்சியரிடம் மனு கொடுக்குமாறு அறிவுறுத்தினர்.

அதன்பின்னர் சரோஜா தனது குடும்பத்தினருடன் ஆட்சியரிடம் மனு கொடுத்தனர். அந்த மனுவின் மீது நடவடிக்கை எடுப்பதாக ஆட்சியர் உறுதியளித்தார். அதன் பின்னர் அவர்கள் அங்கிருந்து கலைந்து சென்றனர்.

இந்த சம்பவத்தால் ஆட்சியர் அலுவலகத்தில் சிறிது நேரம் பரபரப்பு ஏற்பட்டது.