சென்னை - பெங்களூரு டபுள் டெக்கர் ரயிலில் புதிய பெட்டிகள்

இந்திய தென்னகத்தின் இரு முக்கிய மாநகரங்களை இணைக்கும் பிரபலமான சென்னை – பெங்களூரு இரட்டை அடுக்கு விரைவு ரயிலில் பயணிகளுக்கு மகிழ்ச்சியளிக்கும் அறிவிப்பு வெளியாகியுள்ளது. பிப்ரவரி 15, 2024 முதல் இந்த ரயிலில் ஐந்து இரண்டாம் வகுப்பு இருக்கைவசதி பெட்டிகள் இணைக்கப்பட உள்ளன. தெற்கு ரயில்வேயின் இந்த நடவடிக்கையால் பயணிகளுக்கு குறைந்த கட்டணத்தில் பயணிக்கும் வாய்ப்பு கிடைப்பதுடன், கூடுதல் வசதியும் உறுதியாகிறது.

சென்னை சென்ட்ரல் மற்றும் பெங்களூரு இடையே தினமும் இயக்கப்படும் இந்த இரட்டை அடுக்கு விரைவு ரயில் மிகவும் விரும்பப்படும் ரயில்களில் ஒன்றாகும். சென்னை - பெங்களூரு இடையே மிக விரைவான பயணத்தைக் கொடுத்து வரும் இரண்டடுக்கு ரயில், வெறும் 5 மணி நேரம் 10 நிமிடங்களில் கடந்து சூப்பர்ஃபாஸ்ட் ரயிலாக விளங்குகிறது. ஆனால், இந்த பயண தொலைவை பொதுவாகக் கடக்க 6 மணி நேரம் 15 நிமிடங்கள் ஆகுமாம்.

ஏசி வசதியுடைய ரயில் பெட்டிகளை மட்டுமே கொண்டிருந்த சென்னை - பெங்களூரு இரண்டடுக்கு ரயில், இன்று முதல் ஏசி வசதியற்ற ஆறு பெட்டிகளுடன் இயக்கப்படுவதால், நூற்றுக்கணக்கான பயணிகளுக்கு, இந்த ரயிலில் பயணிக்கும் வாய்ப்பு கிடைத்துள்ளது.. தற்போதுள்ள பத்து குளிரூட்டப்பட்ட இருக்கை பெட்டிகளோடு ஐந்து இரண்டாம் வகுப்பு இருக்கை பெட்டிகள் இணைவதால், கட்டணத்தைப் பற்றி கவலைப்படும் பயணிகளுக்கு இது வரப்பிரசாதமாக அமையும். நெடுந்தூரப் பயணத்திற்கு ஒட்டுமொத்தமாக குறைந்த விலையில் சௌகரியமான பயணத்தை மேற்கொள்ள முடியும்.

விரிவாக்கப்படும் மற்றொரு சேவை

இதேபோல், தற்போது ஏழு குளிரூட்டப்பட்ட இரட்டை அடுக்கு பெட்டிகளுடன் இயங்கும் கோயம்புத்தூர் - பெங்களூரு உதய் எக்ஸ்பிரஸ் ரயிலில், எட்டு குளிரூட்டப்பட்ட பெட்டிகள் மற்றும் ஐந்து இரண்டாம் வகுப்பு இருக்கை பெட்டிகள் இணைக்கப்பட இருக்கின்றன.

டிக்கெட் கட்டணம்

சென்னை-பெங்களூரு இரட்டை அடுக்கு ரயிலுக்கான முழுப் பயணத்திற்கு இரண்டாம் வகுப்பு இருக்கைக்கான டிக்கெட் கட்டணம் சுமார் ரூ.140 ஆக நிர்ணயிக்கப்பட்டுள்ளது. குளிரூட்டப்பட்ட பெட்டிகளில் பயணிப்பதை விட பயணச்செலவு வெகுவாகக் குறையும் என்பது குறிப்பிடத்தக்கது. இதன் மூலம் அடிக்கடி, இந்த வழித்தடங்களில் பயணிக்கும் சாமானிய மக்களுக்கும் நடுத்தரக் குடும்பத்தினருக்கும் பயணம் அதிக செலவில்லாததாக மாறும்.

கூடுதல் நன்மைகள்

புதிதாக இணைக்கப்படும் இந்த இரண்டாம் வகுப்பு பெட்டிகள் பயணிகளின் எண்ணிக்கையை கையாள உதவும் என்பதால் கூட்ட நெரிசலைச் சமாளிக்க முடியும். சென்னை - பெங்களூரு வழித்தடத்தில் இயங்கும் 6 மணி 10 நிமிட பயண நேரம் கொண்ட விரைவு ரயில்களை விடவும், வெறும் 5 மணி 45 நிமிடங்களில் பண்டிகை காலங்களில் இரட்டை அடுக்கு ரயிலின் அதிவேகப் பயணத்தை மேற்கொள்ள இயலும். எனவே நேரமும் கணிசமாக மிச்சமாகின்றது.

சென்னை – பெங்களூரு இரட்டை அடுக்கு எக்ஸ்பிரஸ் மற்றும் கோவை – பெங்களூரு உதய் எக்ஸ்பிரஸ் ஆகியவற்றில் இரண்டாம் வகுப்புப் பெட்டிகள் இணைக்கப்படுவது பயணிகளிடையே பெரும் வரவேற்பைப் பெற்றுள்ளது. தெற்கு ரயில்வேயின் இந்த பயணிகள் நலன்சார் நடவடிக்கை தொடர்ந்து பாராட்டுகளைப் பெறுகிறது.

கோயம்புத்தூர்-பெங்களூரு உதய் விரைவு ரயிலின் முதன்மை பராமரிப்புப் பணி பெங்களூரில் இருந்து சென்னைக்கு இடமாற்றம் செய்யப்பட்டதே இந்த முடிவிற்கு காரணம் என்று கூறப்படுகிறது. பெங்களூரில் உள்ள பராமரிப்பு இடம் வந்தே பாரத் விரைவு ரயிலுக்கு ஒதுக்கப்பட்டிருக்கலாம் என்றும் கூறப்படுகிறது.

இந்த வழித்தடத்தை அதிகம் பயன்படுத்தும் பயணிகளோ, பிருந்தாவன் எக்ஸ்பிரஸ் ஆண்டு முழுவதும் நெரிசல் மிகுந்த பெட்டிகளுடன் இயங்குவதாகவும், பகல் நேரங்களில் பெங்களூரு மற்றும் சென்னை இடையே புதிய இன்டர்சிட்டி ரயிலை இயக்க வேண்டும் என்றும் கோரிக்கை விடுத்துள்ளனர்.