மேல்மருவத்தூரில் முனீஸ்வரன் கோவிலில் மதுபோதையில் திருடிய வாலிபர் கைது

செங்கல்பட்டு மாவட்டம் மதுராந்தகம் அடுத்த மேல்மருவத்தூர் ஆதிபராசக்தி கோயிலின் பின்புறத்தில் முனீஸ்வரன் ஆலயம் உள்ளது. இன்று காலை ஆலயத்தில் உண்டியல் உடைக்கப்பட்டு சில்லரைகள் சிதறிக்கிடந்ததை கண்ட பக்தர்கள் கோயிலின் மக்கள் தொடர்பு அலுவலருக்கு தகவல் தெரிவித்தனர். அதன்பேரில் மேல்மருவத்தூர் போலீசார் வழக்கு பதிவு செய்து தீவிர விசாரணை மேற்கொண்டு உண்டியலை உடைத்து திருடிய மர்ம நபரை தேடிவந்தனர்.

இந்த நிலையில், நேற்று இரவு மதுபோதையில் வந்த சந்தேகத்துக்கிடமான நபரை பிடித்து காவல்துறையினர் விசாரணை மேற்கொண்டனர். அப்போது அந்த நபர் முன்னுக்குப்பின் முரணாக பதில் அளித்துள்ளார். அதனால் அவரை  காவல்நிலையத்துக்கு அழைத்துச் சென்றனர்.   

இன்று காலை போதை தெளிந்ததும் அவரிடம் விசாரித்த போது, எலப்பாக்கம் அருகே ஈச்சங்காடு மாரியம்மன் கோவில் தெருவைச் சேர்ந்த முனுசாமி என்பவரின் மகன் வெங்கடேசன் என்பதும்  அவர்தான் கோவில் உண்டியலை உடைத்து திருடியவர் என்பதும் தெரிய வந்தது. 

இதனை தொடர்ந்து அவரை கைது செய்த போலீசார் வழக்கு பதிவு செய்து உண்டில் இருந்து திருடப்பட்ட ரூபாய் 18 ஆயிரம் பணத்தை பறிமுதல் செய்து மதுராந்தகம் குற்றவியல் நடுவர் நீதிமன்றத்தில் ஆஜர்படுத்தி சிறையில் அடைத்தனர்.