தெலுங்கானா மாநிலத்தில் ஒரே நாளில் அதிகபட்ச மழை பதிவு..! வெள்ளத்தில் மிதக்கும் தெலுங்கானா..!

தெலுங்கானா மாநிலத்தில் இன்று (27ம் தேதி ) காலை 8 மணி நிலவரப்படி முலுகு மாவட்டத்தில் 649.8 மி.மீ., மழை பதிவானது. இது இதுவரை பதிவாகாத அதிகபட்ச மழையாகும்.

தெலுங்கானா மாநில வளர்ச்சித் திட்டச் சங்கத்தின் (TSDPS) பதிவுகளின்படி, மாநிலத்தின் வரலாற்றில் இதுவே அதிகபட்ச மழைப்பொழிவு ஆகும் என்று தெரிவிக்கப்பட்டுள்ளது. இதற்கு முந்தைய அதிகபட்ச மழைப்பதிவு பதிவு 2014ம் ஆண்டு ஜூலை 2ம் தேதி அன்று முலுகு மாவட்டத்தில் உள்ள வாஜேடுவில் 517.5 மிமீ ஆகும்.

இதேபோல், அதே மாவட்டத்தில் செல்பூர்- 475.8 மிமீ., மழையும், ரெகோண்டா 467 மிமீ., மழையும் மற்றும் மொகுல்லப்பள்ளி - 394 மிமீ., மழையும் பதிவாகியுள்ளது. இவை இந்த பருவத்தின் அதிகபட்ச மழைப்பொழிவாக பதிவாகியுள்ளன. மேலும் பத்ராத்ரி கொத்தகுடேம் மாவட்டத்தில் உள்ள கரககுடத்தில் 390.5 மி.மீ.

வடக்கு தெலுங்கானாவின் பல பகுதிகளில் கடந்த இரண்டு நாட்களாக கனமழை பெய்து வருகிறது. இன்று காலை 8 மணி வரை மாநிலத்தில் உள்ள 33 மாவட்டங்களில் குறைந்தது 20 மாவட்டங்களில் 200 மிமீக்கு மேல் மழை பதிவாகியுள்ளதாக TSDPS இன் செய்திக்குறிப்பு தெரிவித்துள்ளது.

மாநில தலைநகரான ஹைதராபாத்-ல் , செரிலிங்கம்பள்ளி மண்டலத்தில் உள்ள மியாபூரில் 65.8 மி.மீ.

ஹைதராபாத், ஜங்கான், பூபாலப்பள்ளி, கரீம்நகர், மேட்சல்-மல்காஜ்கிரி, ரங்காரெட்டி, சித்திப்பேட்டை, வாரங்கல், ஹனம்கொண்டா மற்றும் யதாத்ரி-போங்கீர் ஆகிய இடங்களில் அடுத்த 24 மணி நேரத்தில் கனமழை முதல் மிக கனமழை வரை பெய்யக்கூடும் என காலை 7 மணிக்கு ஹைதராபாத்தில் இருந்து இந்திய வானிலை ஆய்வு மையம் (IMD) அறிவிப்பு வெளியிட்டுள்ளது.

ஆறுகள் மற்றும் நீர்நிலைகள் நிரம்பி வழிவது, சாலைகள் துண்டிக்கப்படுவது, குடியிருப்பு பகுதிகள் வெள்ளத்தில் மூழ்குவது போன்ற வீடியோக்கள் சமூக வலைதளங்களில் பரவி வருகின்றன.

ஜெயசங்கர் பூபால்பள்ளி மாவட்டத்தின் மொரஞ்சபள்ளி கிராமத்தில் இருந்து ஒரு வீடியோவில், முழுவதுமாக வெள்ளத்தில் மூழ்கிய மக்கள், கூரையின் மேல் நின்று உதவி கோரி கூச்சலிடுவதைக் காண முடிந்தது. நீரோடைகள் நிரம்பி வழிவதால் பர்கல் மற்றும் பூபாலப்பள்ளி இடையே தேசிய நெடுஞ்சாலை துண்டிக்கப்பட்ட மற்றொரு வீடியோவும் காலையில் வெளிவந்தது. அங்கு பல லாரி ஓட்டுநர்கள் லாரிகளுடன் வெள்ளத்தில் சிக்கித் தவிப்பது தெரிகிறது. மாநில அரசு மீட்பு பணிகளை முடுக்கிவிட்டுள்ளது.