எகிறும் எதிர்பார்ப்பு.. நாளை இரவு வெளியாகிறது துணிவு பட டிரைலர்…

2023 பொங்கல் பண்டிகையை முன்னிட்டு, முன்னணி நடிகர்களான அஜித்குமார் நடித்த துணிவு மற்றும் விஜய் நடித்த வாரிசு படங்கள் வெளியாகிறது. இதனால், தமிழ் திரைப்பட ரசிகர்கள் இரட்டை சந்தோஷத்தில் உள்ளனர். விஜய் நடித்த வாரிசு படத்தின் ஆடியோ வெளியீட்டு விழா சமீபத்தில் நடந்து முடிந்தது.

நடிகர் அஜித்குமார் நடிப்பில் உருவாகியுள்ள துணிவு படத்தில் இடம்பெற்றுள்ள சில்லா.. சில்லா.. மற்றும் காசேதான் கடவுடளா.. ஆகிய பாடல்கள் வெளியாகி இணையதளத்தில் வைரலாக பரவி வருகிறது. இருப்பினும், அஜித் படங்களுக்கு பாடல் வெளியீட்டு விழா நடத்தப்படுவது இல்லை என்பதால் நேரடியாக டிரைலரை வெளியிட பட நிறுவனம் முடிவு செய்துள்ளது.

அதன்படி, துணிவு படத்தின் டிரைலர் நாளை (31-12-22) இரவு 7 மணி அளவில் வெளியிடப்படும் என அதிகாரப்பூர்வமாக அறிவிக்கப்பட்டு உள்ளது. துணிவு படத்தின் தயாரிப்பு நிறுவனமான ஜீ ஸ்டூடியோஸ், துணிவு படத்தை வெளியிடும் ரெட் ஜெயன்ட் மூவிஸ் நிறுவனம், துணிவு படத்தின் இயக்குநர் வினோத், படத்தின் இசையமைப்பாளர் ஜிப்ரான் ஆகியோர் தங்களது டுவிட்டர் பக்கத்தில் துணிவு படத்தின் டிரைலர் வெளியாகும் குறித்த அறிவிப்பை பதிவு செய்து உள்ளனர்.

அதில், நடிகர் அஜித்குமார் கையில் ஒரு துப்பாக்கியுடன் இருப்பது போன்ற படமும், அந்த துப்பாக்கியின் மேலே டிரைலர் பையரிங் பிரம் டுமாரோ 7:00 p.m என்றும் ஆங்கிலத்தில் எழுதப்பட்டுள்ளது. மேலும், துப்பாக்கிகள், தைரியம் மற்றும் மகிமை அனைத்தும் நாளை ஸ்டைலாக சுடப்படும் என்ற வாசகங்கள் இடம் பெற்றுள்ளன. துணிவு படத்தில் இடம்பெற்ற சில்லா.. சில்லா மற்றும் காசேதான் கடவுளடா ஆகிய பாடல்கள் வெளியாகி இணையத்தில் வைரலாக பரவி வரும் நிலையில், தற்போது டிரைலர் குறித்த அறிவிப்பை அஜித் ரசிகர்கள் கொண்டாடி வருகின்றனர்.

எகிறும் எதிர்பார்ப்பு:

அஜித் நடித்த நேர்கொண்ட பார்வை, வலிமை ஆகிய படங்களைத் தொடர்ந்து அஜித்-வினோத் கூட்டணி துணிவு படத்தில் மூன்றாவது முறையாக இணைந்து உள்ளது. இந்தப் படத்தின் இசையமைப்பாளர் ஜிப்ரன் பின்னணி இசையில் அதிரடி காட்டுவார் என்பதால் ரசிகர்கள் மத்தியில் துணிவு படத்திற்கு எதிர்பார்ப்பு அதிகரித்துள்ளது.

போனி கபூரின் ஜீ ஸ்டூடியோஸ் தயாரிப்பில் அதிக பொருட்செலவில் உருவாகியுள்ள துணிவு படத்தை பார்த்த விநியோகஸ்தர்கள் சிலர் படம் சிறப்பாக உருவாகி உள்ளதாக கருத்து தெரிவித்துள்ளனர். அஜித் நடித்த துணிவு மற்றும் விஜய் நடித்த வாரிசு ஆகிய படங்களை உதயநிதி ஸ்டாலினின் ரெட் ஜெயன்ட் மூவிஸ் நிறுவனமே வெளியிடுகிறது.

விஜய் நடித்த வாரிசு படத்தின் ஆடியோ வெளியீட்டு விழா குறித்து இதுவரை சமூக வலைதளங்களில் கருத்துகளை பதிவு செய்து வந்த சினிமா ரசிகர்கள் தற்போது அஜித் நடித்த துணிவு படத்தின் டிரைலர் எப்படி இருக்கும் என விவாதிக்கத் தொடங்கிவிட்டனர்.