ஆதி திராவிடர் காலனியில் புதிய அங்கன்வாடி மையக் கட்டிடம் திறப்பு

இந்தியாவிலேயே முதல் முதலாக பெண்களுக்கு சொத்தில் சம உரிமை வழங்கியது திமுக அரசு என்று சட்டப்பேரவை துணைத் தலைவா் கு.பிச்சாண்டி கூறினாா்.

திருவண்ணாமலை மாவட்டம் கீழ்பெண்ணாத்தூர் தொகுதி சோமாசி பாடி ஊராட்சியில் ஆதிதிராவிடா் காலனியில் ரூ.12.61 லட்சத்தில் புதிதாக கட்டப்பட்ட அங்கன்வாடி மையக் கட்டட திறப்பு விழா நடைபெற்றது.

விழாவுக்கு, ஊராட்சித் தலைவா் ஏழுமலை தலைமை வகித்தாா். மாவட்ட ஊராட்சிக் குழு உறுப்பினா் ஆராஞ்சி ஆறுமுகம், அட்மா குழுத் தலைவா் சிவக்குமாா், முன்னாள் ஒன்றியக் குழு உறுப்பினா் அரிபாலன் ஆகியோா் முன்னிலை வகித்தனா்.

சட்டப்பேரவை துணைத் தலைவா் கு.பிச்சாண்டி சிறப்பு அழைப்பாளராகக் கலந்து கொண்டு அங்கன்வாடி மையக் கட்டடத்தை திறந்து வைத்துப் பேசியதாவது:

இந்தியாவிலேயே முதல் முதலில் தமிழகத்தில் தான் ஒரு கிலோ அரிசி ரூ.1 என்ற விலையில் வழங்கப்பட்டது. இதை வழங்கியவா் அப்போதைய முதல்வா் மு.கருணாநிதி.

இதேபோல, இந்தியாவிலேயே முதல் முதலில் பெண்களுக்கு சொத்தில் சம உரிமையை வழங்கியது திமுக அரசு. பெரியாா் பெண்களுக்கும் சொத்தில் சம உரிமை வழங்க வேண்டும் என்றாா்.

இதை 1989-ஆம் ஆண்டு சட்டமாக இயற்றியவா் அப்போதைய முதல்வா் மு.கருணாநிதி. இதன் பிறகு 16 ஆண்டுகள் கழித்துதான் பிரதமராக மன்மோகன்சிங் இருந்தபோது இந்தியா முழுவதும் இந்தச் சட்டம் கொண்டுவரப்பட்டது ,

தற்போது திமுக ஆட்சியில் தமிழக முதல்வர் அவர்கள் ,பெண்களுக்கு அரசு பேருந்துகளில் இலவச பயணம் , மாணவிகளுக்கு கல்லூரி படிப்பிற்கு ஊக்கத்தொகை, குடும்பத் தலைவிகளுக்கு மாதம் ஆயிரம் , அரசுப் பள்ளியில் காலை உணவு திட்டம் , இலவச மருத்துவ திட்டம், என பல்வேறு திட்டங்களை வழங்கி சிறப்பாக ஆட்சி செய்து வருகிறார்கள். இந்த ஆட்சியில் உங்களைத் தேடி அனைத்து திட்டங்களும் வந்து கொண்டிருக்கிறது. இதனை பொதுமக்கள் நன்கு பயன்படுத்திக் கொள்ள வேண்டும் என துணை சபாநாயகர் பேசினார்.

விழாவில், வட்டார குழந்தைகள் வளா்ச்சித் திட்ட அலுவலா் ரேவதி (பொறுப்பு), ஒன்றியப் பொறியாளா் சிவக்குமாா், ஊராட்சித் தலைவா்கள் குப்புசாமி, விஜயாசேகா் , பேரூராட்சி கவுன்சிலர்கள் , உள்ளாட்சி பிரதிநிதிகள், திமுக சோமாசி பாடி பகுதி செயலாளர் குணசேகரன், பொதுமக்கள் உள்பட பலா் கலந்து கொண்டனா்.