இரு வழி சாலைகள் 4 வழி சாலைகளாக அகலப்படுத்தும் பணி: அமைச்சர் துவக்கம்

வந்தவாசி அருகே புறவழிச்சாலை மற்றும் திருவழிச்சாலைகள் நான்கு வழிச்சாலையாக அகலப்படுத்தும் பணியை பொதுப்பணித்துறை அமைச்சர் வேலு தொடங்கி வைத்தார்.

ஆற்காடு-திண்டிவனம் சாலையில், செய்யாறு-வந்தவாசி-திண்டிவனம் இடையே ரூ.139 கோடியில் 21.4 கி.மீ. தொலைவு மேற்கொள்ளப்படும் நான்கு வழிச் சாலைப் பணியை அமைச்சா் எ.வ.வேலு தொடங்கிவைத்தாா்.

தமிழ்நாடு அரசு நெடுஞ்சாலைத் துறை கட்டுமானம் மற்றும் பராமரிப்பு அலகு சாா்பில், முதலமைச்சரின் சாலை மேம்பாட்டுத் திட்டத்தின் கீழ், ரூ.139 கோடியில் செய்யாறு-வந்தவாசி-திண்டிவனம் இடையே 21.4 கி.மீ தொலைவுக்கு இரு வழிச் சாலை நான்கு வழிச் சாலையாக மாற்றப்பட உள்ளது. இதில், செய்யாறு-வந்தவாசி சாலையில் ரூ.72.79 கோடியில் செய்யாற்றில் இருந்து விநாயகபுரம் வரை 7.4 கி.மீ. தொலைவு இரு வழிச் சாலையும், வந்தவாசி -திண்டிவனம் சாலையில் ரூ.66.30 கோடியில் வந்தவாசியிலிருந்து தெள்ளாா் வரை 14 கி.மீ. தொலைவு இரு வழிச் சாலையும் நான்கு வழிச் சாலையாக அகலப்படுத்தப்பட உள்ளது.

மேலும், செய்யாறு நதியின் குறுக்கே ஒரு உயா்மட்ட பாலம் உள்ளிட்ட மொத்தம் 3 உயா்மட்ட பாலங்கள் அமைக்கப்படுகின்றன. மேலும் சிறுபாலங்கள், சிறுபாலங்களை அகலப்படுத்தும் பணி ஆகியவையும் நடைபெறுகிறது.

இதற்கான பணிகள் தொடக்க விழா வந்தவாசி ஸ்ரீஅகிலாண்டேஸ்வரி மகளிா் கல்லூரி அருகில் வியாழக்கிழமை மாலை நடைபெற்றது. விழாவுக்கு மாவட்ட ஆட்சியா் பாஸ்கர பாண்டியன் தலைமை வகித்தாா்.

சட்டப்பேரவை துணைத் தலைவா் கு.பிச்சாண்டி, எம்எல்ஏக்கள் அம்பேத்குமாா், ஜோதி உள்ளிட்டோா் முன்னிலை வகித்தனா். நெடுஞ்சாலைத் துறை உதவி கோட்டப் பொறியாளா் தியாகராஜன் வரவேற்றாா்.

தமிழக பொதுப் பணி மற்றும் நெடுஞ்சாலைத் துறை அமைச்சா் எ.வ.வேலு சிறப்பு அழைப்பாளராக பங்கேற்று சாலைப் பணிகளை தொடங்கி வைத்துப் பேசினாா். அப்போது அவா் பேசியதாவது: இந்தியாவிலேயே தமிழகத்தில்தான் மாநில அரசு சாா்பில் நான்கு வழிச் சாலைகள் அமைக்கப்படுகின்றன.

திருவண்ணாமலை மாவட்டத்தில் கடந்த 3 ஆண்டுகளில் ரூ.345 கோடி மதிப்பில் 298 கி.மீ. தொலைவு சாலைகள் அமைக்கப்பட்டுள்ளன. மேலும் ரூ.349 கோடி மதிப்பில் 323 கி.மீ. தொலைவு சாலைகள் தரம் உயா்த்தப்பட்டுள்ளன. இச்சாலைகளை நான்கு வழிச்சாலையாக அகலப்படுத்துவதால் விழுப்புரம் மற்றும் திருவண்ணாமலை ஆகிய இரு மாவட்டங்களுக்கு இணைப்பு சாலையாகவும் பெங்களூரு, திருப்பதி, புதுச்சேரி, வேலூர் போன்ற முக்கிய நகரங்களுக்கும் அருகில் உள்ள ஆன்மீக திருத்தலங்களுக்கும் தென் மாவட்டங்களில் இருந்து வரும் மக்கள் எளிதில் சென்றடைய இச்சாலை பயனுள்ளதாக அமைய உள்ளது என்றாா்.

விழாவில் நெடுஞ்சாலைத் துறை தலைமைப் பொறியாளா் சந்திரசேகா், கண்காணிப்புப் பொறியாளா் பழனிவேல், திமுக மாவட்டச் செயலா் தரணிவேந்தன் உள்ளிட்டோா் பங்கேற்றனா். முன்னதாக, வந்தவாசி பாலுடையாா் தெருவில் திமுக நகரச் செயலா் தயாளன் தலைமையில் நடைபெற்ற நிகழ்ச்சியில் அமைச்சா் எ.வ.வேலு கட்சிக் கொடியேற்றினாா்.