திருவள்ளூர் அருகே இருவரை பலி கொண்ட விபத்து காட்சி இணையத்தில் வைரல்

மீஞ்சூர் - வண்டலூர் வெளிவட்ட சாலையில் டிராக்டர் மீது அதிவேகமாக வந்த சொகுசு கார் மோதி தலை குப்புற கவிழ்ந்த விபத்தின் சி.சி.டி.வி. காட்சிகள் வெளியாகி பரபரப்பை ஏற்படுத்தி உள்ளது. இந்த விபத்தில் மாணவர்கள் இருவர் உயிரிழந்தனர். மூவர் படுகாயங்களுடன் மருத்துவமனையில் அனுமதிக்கப்பட்டு உள்ளனர்.

திருவள்ளூர் மாவட்டம், மீஞ்சூரை சேர்ந்த வியாபாரிகளான சண்முகம் - மகேஸ்வரி ஆகியோர் மகள் கவி வர்ஷா (18) மகன் கவி வர்ஷன் (14) ஆகியோருடன் பொங்கல் பண்டிகைக்காக சொந்த ஊருக்கு சென்று விட்டு காணும் பொங்கல் தினமான புதன்கிழமை மீண்டும் மீஞ்சூருக்கு திரும்பினர். காரை மகேஸ்வரி ஓட்டி வந்த போது மீஞ்சூர் - வண்டலூர் வெளிவட்ட சாலையில் கும்மனூர் அருகே வந்து கொண்டிருந்த போது முன்னால் சென்ற டிராக்டர் மீது அசுர வேகத்தில் வந்து மோதிய விபத்தில் கார் தலை குப்புற கவிழ்ந்து அப்பளம் போல நொறுங்கியது. இந்த விபத்தில் மகள் கவிவர்ஷா, மகன் கவிவர்ஷன் இருவர் பரிதாபமாக உயிரிழந்தனர்.

தந்தை சண்முகம், தாய் மகேஸ்வரி, டிராக்டர் ஓட்டுநர் சந்தோஷ் ஆகிய மூவரும் படுகாயங்களுடன் ஸ்டான்லி அரசு மருத்துவமனையில் தீவிர சிகிச்சை பிரிவில் அனுமதிக்கப்பட்டு சிகிச்சை பெற்று வருகின்றனர். இந்த விபத்து தொடர்பாக செங்குன்றம் போக்குவரத்து புலனாய்வு போலீசார் வழக்கு பதிவு செய்து விசாரணை மேற்கொண்டு வருகின்றனர்.

இதனிடையே இந்த விபத்து தொடர்பான சி.சி.டி.வி. காட்சிகள் வெளியாகி பரபரப்பை ஏற்படுத்தியுள்ளது. சாலையில் சென்று கொண்டிருந்த டிராக்டர் மீது அசுர வேகத்தில் வந்த சொகுசு கார் மோதியதில் இரண்டு வாகனங்களும் கவிழும் காட்சிகள் பதிவாகி உள்ளது. இந்த காட்சிகள் சமூக வலைத்தளங்களில் வேகமாக பகிரப்பட்டு வருகிறது.