மின்கம்பத்தில் ஏறி தற்கொலைக்கு முயற்சி: பல்லடம் அருகே பரபரப்பு

திருப்பூர் மாவட்டம், பல்லடத்தில் கோவை திருச்சி தேசிய நெடுஞ்சாலை, நால்ரோடு பகுதியில் தானியங்கி போக்குவரத்து சிக்னல் அமைக்கப்பட்டுள்ளது. இங்கு, நேற்று முன்தினம் 30 வயது மதிக்கத்தக்க வாலிபர், சிக்னல் கம்பத்தில் ஏறி தலைகீழாக தொங்கி குதிக்க முயற்சி செய்தார்.

தகவல் அறிந்த போக்குவரத்து போலீசார், தீயணைப்பு வீரர்கள் சென்று வாலிபரை மீட்டனர். மீட்கப்பட்ட வாலிபர் பல்லடம் அரசு ஆஸ்பத்திரிக்கு அனுப்பி வைத்தனர். அவரிடம் போலீசார் நடத்திய விசாரணையில் அவர் ஒடிசா மாநிலத்தைச் சேர்ந்த காங்கேஷ்வர். 32 என்பதும், தனியார் நிறுவனத்தில் டிரைவராக வேலை பார்த்து வருவதும் தெரியவந்தது.

கடந்த 3 நாட்களுக்கு முன்பு, பல்லடம் அருகே உள்ள கோடங்கிபாளையத்தில், மர்ம ஆசாமிகள் 3 பேர் இவரை கத்தியால் குத்தி, செல்போன் மற்றும் ரூ.4,500 ஆகியவற்றை பறித்து சென்றுள்ளனர். சிகிச்சைக்காக கோவை அரசு ஆஸ்பத்திரியில், அனுமதிக்கப்பட்ட நிலையில் அங்கிருந்து தப்பி பல்லடம் வந்தபோது, தற்கொலைக்கு முயன்றது தெரியவந்தது.