தடைசெய்யப்பட்ட புகையிலை பொருட்கள் விற்பனை:தஞ்சை மாவட்டத்தில் 59 பேர் கைது

தஞ்சை மாவட்டத்தில் அரசால் தடை செய்யப்பட்ட புகையிலை பொருட்கள் விற்பனை செய்யப்படுவதாக போலீஸ் சூப்பிரண்டு ரவளிபிரியாவுக்கு தொடர்ந்து புகார்கள் வந்தன.

இதுகுறித்து உடனே நடவடிக்கை எடுக்குமாறு துணை போலீஸ் சூப்பிரண்டுகள், இன்ஸ்பெக்டர்கள், மற்றும் சப்-இன்ஸ்பெக்டர்களுக்கு உத்தரவிட்டார்.அதன் பேரில் போலீசார் மாவட்டம் முழுவதும் கடைகள் உள்ளிட்ட பகுதிகளில் தீவிர சோதனை நடத்தினர்.

அப்போது தஞ்சை மாநகர பகுதிகளில் உள்ள தஞ்சை மருத்துவக்கல்லூரி போலீசார் நடத்திய சோதனையில் 2 பேரையும், கிழக்கு போலீசார் 4 பேரையும், மேற்கு போலீசார் 4 பேரையும், தெற்கு போலீசார் 2 பேரையும், தாலுகா போலீசார் 2 பேரையும் கைது செய்தனர். வல்லம் போலீசார் 4 பேரையும், தமிழ்ப்பல்கலை கழக போலீசார் 3 பேரையும் கைது செய்தனர்.

இதேபோல் மாவட்டம் முழுவதும் போலீசார் மேற்கொண்ட சோதனையில் ஒரத்தநாடு பகுதிகளில் 6 பேரையும், பட்டுக்கோட்டை பகுதிகளில் 7 பேரையும், திருவையாறு பகுதியில் 2 பேரையும் போலீசார் கைது செய்தனர். தஞ்சை புறநகர் பகுதிகளில் 7 பேரையும், கும்பகோணத்தில் 10 பேரையும், திருவிடைமருதூர் பகுதியில் 6 பேரையும் கைது செய்தனர்.