சேந்தமங்கலத்தில் அத்துமீறிய பேனர்கள் அகற்றம்

அனுமதியற்ற பிளக்ஸ் பேனர்கள் அகற்றம், சேந்தமங்கலத்தில் அதிகாரிகளின் நடவடிக்கை பொதுமக்கள் வரவேற்பு

சேந்தமங்கலம் நகரம் மற்றும் அதன் சுற்றுப்புறங்களில் முறையான அனுமதியின்றி வைக்கப்பட்டிருந்த ஏராளமான பிளக்ஸ் பேனர்களை அகற்றும் பணி நேற்று தீவிரமாக நடைபெற்றது. குறிப்பாக சேந்தமங்கலம் டவுன் பஞ்சாயத்து எல்லைக்குட்பட்ட பகுதிகள் மற்றும் நெடுஞ்சாலையின் இருபுறமும் பல்வேறு அரசியல் கட்சிகள், வணிக நிறுவனங்கள் மற்றும் தனிநபர்களால் அமைக்கப்பட்டிருந்த அனுமதியற்ற பிளக்ஸ் பேனர்கள் சாலையில் செல்பவர்களுக்கு இடையூறாக இருந்ததோடு, மழைக்காலம் மற்றும் காற்று அதிகமாக வீசும் காலங்களில் இவை கீழே விழுந்து விபத்துக்களை ஏற்படுத்தக்கூடிய அபாயமும் இருந்தது. இந்நிலையில் நேற்று சேந்தமங்கலம் போலீசார், டவுன் பஞ்சாயத்து அதிகாரிகள் மற்றும் நெடுஞ்சாலைத்துறை பணியாளர்கள் இணைந்து நடத்திய கூட்டு நடவடிக்கையில், பல்வேறு இடங்களில் வைக்கப்பட்டிருந்த அனைத்து அனுமதியற்ற பிளக்ஸ் பேனர்களும் முழுமையாக அகற்றப்பட்டன. இந்த நடவடிக்கையை சாலையில் பயணிக்கும் வாகன ஓட்டிகள் மற்றும் பொதுமக்கள் வரவேற்றுள்ளனர். மேலும் எதிர்காலத்தில் அனுமதி பெற்றே பேனர்கள் வைக்க வேண்டும் என்றும் அதிகாரிகள் எச்சரித்துள்ளனர்.