எடப்பாடி அருகே ஏரியை உடைத்தவர்கள் மீது நடவடிக்கை எடுக்க விவசாயிகள் சாலை மறியல்

சேலம் மாவட்டம், எடப்பாடி அடுத்த வெள்ளரிவெள்ளி கிராமத்தில் உள்ள ஏரியில் 40 ஆண்டுகளுக்கு பிறகு கடந்த இரண்டு வருடங்களாக தண்ணீர் நிரம்பியுள்ள நிலையில், அப்பகுதியில் உள்ள 500 ஏக்கர் விவசாய நிலங்கள் பாசன வசதி பெற்று வருகிறது.

இந்நிலையில் கடந்த 26ம் தேதி மர்ம நபர்கள் ஏரியின் மதகு பகுதியை உடைத்துள்ளனர். இதனால் ஏரியில் இருந்து தண்ணீர் வீணாக வெளியேறி வருகிறது. இதுதொடர்பாக அப்பகுதி விவசாயிகள் அதிகாரிகளுக்கு பலமுறை தகவல் தெரிவித்தும் எந்தவித நடவடிக்கையும் எடுக்கப்படவில்லை என கூறப்படுகிறது.

எனவே இதனை கண்டித்து வெள்ளரிவெள்ளி விவசாயிகள் மற்றும் பொதுமக்கள் நூற்றுக்கும் மேற்பட்டோர் ஏரியின் மதகை உடைத்த மர்ம நபர்கள் மீது நடவடிக்கை எடுக்கக்கோரி வெள்ளரி வெள்ளி நான்கு ரோடு சந்திப்பில் சாலை மறியலில் ஈடுபட்டனர்.

இத்தகவல் அறிந்த எடப்பாடி காவல் ஆய்வாளர் கோபாலகிருஷ்ணன், கிராம நிர்வாக அலுவலர் மற்றும் பூலாம்பட்டி காவல்துறையினர் சாலை மறியல் நடைபெற்ற இடத்திற்கு விரைந்து வந்து விவசாயிகளிடம் பேச்சுவார்த்தை நடத்தி ஏரியில் உடைப்பு ஏற்பட்ட இடத்தை பார்வையிட்டு உடைப்பை சரி செய்ததால் விவசாயிகள் சாலை மறியலை கைவிட்டு சென்றனர். இந்த சாலை மறியலால் ஒரு மணி நேரம் போக்குவரத்து பாதிப்பு ஏற்பட்டது.