கோடநாடு கொலை, கொள்ளை வழக்கு விசாரணை: இருவர் கைது

கோடநாடு எஸ்டேட் கொலை, கொள்ளை வழக்கு கூடுதல் விசாரணை, மேற்கு மண்டல ஐ.ஜி. சுதாகர் மேற்பார்வையில் ஏ.டி.எஸ்பி. கிருஷ்ணமூர்த்தி தலைமையில், 5 தனிப்படைகள் அமைக்கப்பட்டு, ஊட்டியில் உள்ள பழைய மாவட்ட கண்காணிப்பாளர் அலுவலகத்தில் நடத்தப்பட்டு வருகிறது. அரசு தரப்பு சாட்சிகள் குற்றம்சாட்டப்பட்டவர்கள் என அனைவரிடமும் விசாரணை நடத்தப்பட்டு வருகிறது.

அதேபோல், கடந்த 2017ம் ஆண்டு ஜூலை 3ம் தேதி கோடநாடு எஸ்டேட் கணிணி ஆப்ரேட்டர் தினேஷ்குமார் தற்கொலை செய்து கொண்டார். அந்த வழக்கையும் தனிப்படை போலீசார் மறு விசாரணை செய்து வருகின்றனர். கோடநாடு எஸ்டேட் கொள்ளை வழக்கிற்கு மூலகாரணமாக இருந்த கனகராஜ், வாகன விபத்தில் இறந்துள்ளார். அந்த வழக்கையும் தனிப்படை போலீசார் சேலத்தில் விசாரணை மேற்கொண்டு வந்தனர்.

இந்த விபத்து சம்பவம் மற்றும் கோடநாடு கொள்ளையில், சாட்சியங்களை கலைத்ததும் விசாரணையில் தெரியவந்தது அதன் அடிப்படையில் கனகராஜின் சகோதரர் தனபால் மற்றும் கனகராஜின் நண்பர் ரமேஷ் ஆகிய இருவரை, சேலத்தில் கைது செய்து மாலையில் நீலகிரி மாவட்ட அமர்வு நீதிமன்ற நீதிபதி முன்பு ஆஜர்படுத்தினர். பின்னர், கூடலூர் கிளைச்சிறைக்கு தனிப்படை போலீசார் பாதுகாப்புடன் அழைத்து சென்றனர்.