எலச்சிபாளையத்தில் கார், டூ வீலர் மோதி விபத்து: 2 பேர் பலி

இராசிபுரம் தாலுக்கா, சீராப்பள்ளியைச் சேர்ந்தவர்கள் முருகேசன் (46), கிருஷ்ணன் (45), இளவரசன் (26). உறவினர்களான இவர்கள் 3 பேரும் பெயிண்டிங் தொழிலாளர்கள். சம்பவத்தன்று 3 பேரும் சீராப்பள்ளியில் இருந்து திருச்செங்கோடு மலையடிவாரம் பகுதியில் உள்ள ஒரு பெட்ரோல் பங்க்கில் பெயிண்ட் அடிக்கும் பணிக்காக, ஒரு டூ வீலரில் சென்று கொண்டிருந்தனர்.

முருகேசன் டூ வீலரை ஓட்டிச் சென்றார். கிருஷ்ணன், இளவரசன் ஆகியோர் பின்னால் அமர்ந்து சென்றனர். எலச்சிபாளையம் போலீஸ் நிலையம் அருகே சென்றபோது, அவ்வழியாக வந்த காரும், டூ வீலரும் மோதிக்கொண்டன. இந்த விபத்தில் டூ வீலரை ஓட்டிச் சென்ற முருகேசன் பலத்த காயம் அடைந்து சம்பவ இடத்திலேயே உயிரிழந்தார். கிருஷ்ணன், இளவரசன் ஆகியோர் படுகாயம் அடைந்து உயிருக்கு போராடினர்.

அருகில் இருந்தவர்கள் கிருஷ்ணன், இளவரசனை மீட்டு திருச்செங்கோடு அரசு ஆஸ்பத்திரிக்கு அனுப்பி வைத்தனர். பின்னர் 2 பேரும் மேல்சிகிச்சைக்காக ஈரோட்டில் உள்ள தனியார் ஆஸ்பத்திரிக்கு அனுப்பி வைக்கப்பட்டனர். செல்லும் வழியில் கிருஷ்ணன் பரிதாபமாக இறந்தார். இளவரசன் ஈரோடு தனியார் ஆஸ்பத்திரியில் அனுமதிக்கப்பட்டு சிகிச்சை பெற்று வருகிறார். இந்த விபத்து குறித்து எலச்சிபாளையம் போலீசார் வழக்குப்பதிவு செய்து விசாரணை நடத்தி வருகின்றனர்.