கேஸ் சிலிண்டருக்கு பாடை கட்டி ஆர்ப்பாட்டம்

திருச்செங்கோட்டை அடுத்த எலச்சிபாளையத்தில் பெட்ரோல், டீசல் மற்றும் கேஸ்சிலிண்டர் விலை உயர்வை கண்டித்து சிலிண்டருக்கு பாடை கட்டி ரோட்டில் விறகு அடுப்பு வைத்து சமையல் செய்யும் போராட்டம் நடைபெற்றது.

பெட்ரோல், டீசல் மற்றும் கேஸ் சிலிண்டர் விலை நாளுக்கு நாள் உயர்ந்து கொண்டே செல்கிறது. இதனால் அத்தியாவசிய பொருட்களின் விலை பன்மடங்காக உயரும் அபாயம் ஏற்பட்டுள்ளது. பெட்ரோல், டீசல் விலையை குறைக்க வலியுறுத்தி மார்க்சிஸ்ட் கம்யூனிஸ்ட் கட்சி சார்பில் 3 தினங்களுக்கு தமிழகம் முழுவதும் போராட்டங்கள் நடைபெற்று வருகின்றன.இதன் ஒரு பகுதியாக நாமக்கல் மாவட்டம் திருச்செங்கோடு அருகே உள்ள எலச்சிபாளையத்தில் இன்று ஆர்ப்பாட்டம் நடைபெற்றது.

ஆர்ப்பாட்டத்தில் கேஸ் சிலிண்டருக்கு மாலை அணிவித்து பாடை கட்டி எடுத்து வந்து எலச்சிபாளையம் பேருந்து நிறுத்தத்தின் அருகே வைத்தும் விறகு அடுப்பு வைத்து சமையல் செய்வது போன்றும் பெட்ரோல் மற்றும் டீசல் நிரம்பிய கேனுக்கு மாலை அணிவித்து பெட்ரோல் டீசல் விலையை குறைக்க வேண்டும் என்று முழக்கங்களை எழுப்பினார்கள். மேலும் சோக பாடல்களை ஒலிக்கவிட்டு ஆர்ப்பாட்டத்தில் ஈடுபட்டனர்.