புதிய பஸ் ஸ்டாண்டில் 25 கடைகள் திறக்காமல் பூட்டிக்கிடக்கின்றன

ஏலத்தொகை அதிகம்: 25 கடைகளை திறக்க தயக்கம் - மாநகராட்சியிடம் திரும்ப ஒப்படைக்க முடிவு

நாமக்கல் புதிய பேருந்து நிலையத்தில் ஏலம் எடுக்கப்பட்ட கடைகள் பெரும்பாலானவை திறக்கப்படாமல் பூட்டப்பட்ட நிலையில் காணப்படுகின்றன. அதிக வாடகை காரணமாக குத்தகைதாரர்கள் கடைகளைத் திறந்து வணிகம் செய்ய தயங்குகின்றனர். இதனால், ஏலம் எடுத்த கடைகளை நாமக்கல் மாநகராட்சியிடம் திரும்ப ஒப்படைக்க குத்தகைதாரர்கள் முடிவெடுத்துள்ளனர்.

நாமக்கல் மாநகராட்சிக்குட்பட்ட முதலைப்பட்டி பகுதியில் ரூ.20 கோடி மதிப்பீட்டில் கட்டப்பட்ட புதிய பேருந்து நிலையத்தை முதலமைச்சர் மு.க. ஸ்டாலின் கடந்த 2024 நவம்பர் 22 அன்று திறந்து வைத்தார். இந்த பேருந்து நிலையத்தில் 57 கடைகள், இரண்டு உணவகங்கள், மூன்று கட்டண கழிப்பிடங்கள், பொருள் பாதுகாப்பு அறை மற்றும் வாகன நிறுத்துமிடங்கள் அமைக்கப்பட்டுள்ளன.

2024 அக்டோபர் 4 மற்றும் 28 ஆகிய தேதிகளில் நடைபெற்ற பொது ஏலத்தில் மொத்தம் 55 கடைகள் ஏலம் விடப்பட்டன. இக்கடைகள் குறைந்தபட்சம் ரூ.16,000 முதல் அதிகபட்சம் ரூ.41,500 வரை மாத வாடகைக்கு ஏலம் எடுக்கப்பட்டன. ஆனால், நான்கு மாதங்கள் கடந்த நிலையிலும் 20-க்கும் மேற்பட்ட கடைகள் இன்னும் திறக்கப்படாமல் பூட்டப்பட்டுள்ளன. ஏற்கனவே திறக்கப்பட்ட கடைகளுக்கும் போதிய வருவாய் இல்லாமல் வியாபாரிகள் சிரமப்படுகின்றனர்.

கடை ஏலம் எடுத்த குத்தகைதாரர்களின் கருத்துப்படி, பயணிகள் கூட்டம் குறைவாக இருப்பதால் அதிக வாடகையுடன் வியாபாரம் செய்வது சாத்தியமில்லை என்கின்றனர். ஆரம்ப ஆர்வத்தில் அதிக தொகைக்கு ஏலம் எடுத்ததாகவும், ஒரு ஆண்டுக்கான மாத வாடகை மற்றும் வைப்புத் தொகை ஆகியவற்றைச் செலுத்திவிட்டதாகவும் குறிப்பிடுகின்றனர்.

இந்நிலையில், ஏலத்தொகையைக் குறைக்க மாநகராட்சி நிர்வாகம் நடவடிக்கை எடுக்க வேண்டும் என்று கோரிக்கை வைத்துள்ளனர். அவ்வாறு நடவடிக்கை எடுக்கப்படாவிடில், அடுத்த இரண்டொரு மாதங்களில் கடைகளை மாநகராட்சி நிர்வாகத்திடம் திரும்ப ஒப்படைப்பதைத் தவிர வேறு வழியில்லை எனக் குத்தகைதாரர்கள் தெரிவிக்கின்றனர்.