சேந்தமங்கலம் அருகே நடுரோட்டில் தனியார் சொகுசு பஸ் கவிழ்ந்து விபத்து
நாமக்கல் - சேலம் தேசிய நெடுஞ்சாலையில் செல்லப்பம்பட்டி அருகே நடு ரோட்டில் கவிழ்ந்து விபத்துக்குள்ளான தனியார் சொகுசு பஸ்.
சேந்தமங்கலம் அருகே தேசிய நெடுஞ்சாலையில் தனியார் சொகுசு பஸ் திடீரென சாலையின் குறுக்கே கவிழ்ந்து விபத்துக்குள்ளானது.
பெங்களூரில் இருந்து குமுளி நோக்கி தனியார் சொகுசு பஸ் சென்றுகொண்டிருந்தது. அதிகாலை நேரத்தில், சேந்தமங்கலம் அருகே புதன்சந்தை வழியாக தேசிய நெடுஞ்சாலையில் அந்த பஸ் சென்றது.
செல்லப்பம்பட்டி பிரிவு ரோடு அருகே அந்த பஸ் சென்றபோது, திடீரென்று கட்டுப்பாட்டை இழந்து, சாலை தடுப்பில் மோதி, எதிர்திசையில் சென்று நடு ரோட்டில் கவிழ்ந்தது.
அப்போது அவ்வழியாக வாகனங்கள் எதுவும் வராததால் பெரும் விபத்து தவிர்க்கப்பட்டது. இந்த விபத்தில், பஸ்சில் பயணம் செய்த ஒரு பெண் மட்டும் காயமடைந்தார். மற்ற பயணிகள் அதிர்ஷ்டவசமாக உயிர் தப்பினார்கள்.
இச்சம்பவம் குறித்து நல்லிபாளையம் போலீசார் வழக்கு பதிவு செய்து விசாரணை நடத்தி வருகின்றனர்.
Next Story
