சேந்தமங்கலத்தில் கல்லறைகள் இடிப்பை கண்டித்து கிறிஸ்தவர்கள் சாலை மறியல்

சேந்தமங்கலம் அரசு பெண்கள் மேல்நிலைப் பள்ளி எதிரில் எஸ்.பி.எம். தேவாலயம் உள்ளது. அதன் பின்னால் கிறிஸ்தவர்களுக்கு சொந்தமான கல்லறைத் தோட்டம் அமைந்துள்ளது. அங்கு கடந்த மாதம் அங்கிருந்த சில கல்லறைகள் மர்ம நபர்களால் இடிக்கப்பட்டுள்ளது. இதை அறிந்த எஸ்.பி.எம். திருச்சபை நிர்வாகத்தினர் சேந்தமங்கலம் போலீசில் புகார் செய்தனர். இதுவரை நடவடிக்கை எடுக்கப்படவில்லை. இதனால் நேற்று எஸ்.பி.எம். தேவாலயம் முன்பு கிறிஸ்தவர்கள் ஒன்று திரண்டு சேந்தமங்கலம்-நாமக்கல் செல்லும் மெயின் ரோட்டில், திடீரென்று சாலை மறியலில் ஈடுபட்டனர். இதனால் போக்குவரத்து பாதிக்கப்பட்டது.

தகவல் அறிந்து அங்கு வந்த, சேந்தமங்கலம் போலீஸ் இன்ஸ்பெக்டர் சதீஷ்குமார் மற்றும் அதிகாரிகள், கிறிஸ்தவ மதபோதகர் அருண் பிலிப், நிர்வாகி கமலேஷ், சிறுபான்மை நல உரிமைகள் பிரிவு அமைப்பாளர் சாம்சம்பத் ஆகியோரிடம் பேச்சுவார்த்தை நடத்தினார். அப்போது கல்லறைகள் இடித்தது சம்பந்தமாக விசாரணை நடைபெற்று வருகிறது. மேலும் சேந்தமங்கலம் தாசில்தார் அலுவலகத்தில் சமாதான பேச்சுவார்த்தைக்கு ஏற்பாடு செய்து பிரச்சினையை சமூக தீர்த்துக்கொள்ளலாம் என்று தெரிவித்தார். அதைத்தொடர்ந்து சாலை மறியலில் ஈடுபட்டவர்கள் கலைந்து சென்றனர்.