ரிக் வண்டி அலுவலகத்தில் ரூ. 3.80 லட்சம் கொள்ளை: 9 தொழிலாளர்கள் கைது

நாமக்கல் மாவட்டம், எருமப்பட்டி அருகே உள்ள சிங்களங்கோம்பையை சேர்ந்தவர் ராஜேஷ் (33). இவர் நாமக்கல் பொன்னேரியில் உள்ள பெட்ரோல் பங்க்கில் பங்குதாரராக உள்ளார். இவர் ரிக் வண்டி வைத்து போர்வெல் அமைக்கும் தொழில் செய்து வருகிறார். இவருக்கு சொந்தமான ரிக் வண்டியில் கடந்த 4 மாதங்களாக சட்டீஸ்கர் மாநிலத்தைச் சேர்ந்த 9 தொழிலாளர்கள் பணியாற்றி வந்தனர்.

எருமப்பட்டி அருகே பொன்னேரியில் உள்ள பெட்ரோல் பங்க் பின்புறம், ரிக் வண்டியை நிறுத்தி விட்டு அங்கிருந்த அலுவலகத்தில், வடமாநில தொழிலாளர்கள் 9 பேரும் தங்கி இருந்தனர். கடந்த 7-ந் தேதி காலையில் ராஜேஷ், பெட்ரோல் விற்பனை நிலையம் பின்புறம் உள்ள தனது ரிக் வண்டி அலுவலகத்துக்கு சென்றார். அப்போது, அலுவலகத்தின் ஜன்னல் கம்பிகள் வளைக்கப்பட்டு இருப்பதைக் கண்டு அதிர்ச்சியடைந்தார். உள்ளே சென்று பார்த்தபோது, அங்கிருந்த டேபிளின் பூட்டு உடைக்கப்பட்டு அதில் வைக்கப்பட்டு இருந்த ரூ.3 லட்சத்து 80 ஆயிரத்தை மர்ம நபர்கள் திருடிச்சென்றது தெரியவந்தது.

மேலும், ரிக் வண்டியில் இருந்த சட்டீஸ் மாநில தொழிலாளர்கள் 9 பேரும் மாயமாகி இருப்பதும் தெரியவந்தது. சட்டீஸ்கர் மாநில தொழிலாளர்கள்தான் பணத்தை திருடிச் சென்றிருக்கலாம் என்று நினைத்து அவர் எருமப்பட்டி போலீசில் புகார் செய்தார். சப்-இன்ஸ்பெக்டர் பூபதி மற்றும் போலீசார் அடங்கிய தனிப்படையினர் தப்பிஓடிய வடமாநில தொழிலாளர்களை தேடும் பணியில் ஈடுபட்டனர். அந்த கும்பல், கிருஷ்ணகிரி சுங்கச்சாவடி அருகே நின்று கொண்டிருப்பதாக கிடைத்த தகவலின் பேரில், அங்கு விரைந்து சென்ற போலீசார், அவர்கள் 9 பேரையும் மடக்கிப் பிடித்து விசாரித்தனர்.

விசாரணையில் அவர்கள் சத்தீஷ்கார் மாநிலத்தை சேர்ந்த ரிக் வண்டி தொழிலாளர்கள் விமல் யாதவ் (22), சேசன்தர்வோ (27), பிரதீப் (22), சஞ்சய் குமார் (19, ஜீதகமார் சூரி (20), தோவானாந்த் (23), துளசிநாத் (22), நாதாலாந்தீம் (28), லட்சுமண சின்னா (20) ஆகியோர் என்பதும், அவர்கள் தான் ரிக் வண்டி உரிமையாளர் ராஜேஷின் அலுவலகத்தில் பணத்தை திருடியதும் தெரியவந்தது. அவர்கள் 9 பேரையும் போலீசார் கைது செய்து, அவர்களிடம் இருந்து ரூ.3 லட்சத்து 80 ஆயிரம் ரொக்கத்தையும் போலீசார் மீட்டனர். பின்னர் அவர்கள் 9 பேரும் நாமக்கல் மாஜிஸ்திரேட் கோர்ட்டில் ஒப்படைக்கப்பட்டனர்.