நாமக்கல் எட்டு தாலுகா அலுவலகங்களில் ரேஷன் குறைதீர் முகாம்

8 தாலுகா அலுவலகங்களில் இன்று ரேஷன் குறைதீர் முகாம்

நாமக்கல்: "மாவட்டத்தில் உள்ள எட்டு தாலுகா அலுவலகங்களில் இன்று பொதுவினியோக திட்ட மக்கள் குறைதீர் நாள் முகாம் நடைபெறும்" என நாமக்கல் மாவட்ட ஆட்சியர் திருமதி உமா தெரிவித்துள்ளார்.

நாமக்கல் மாவட்டத்தில் பொது வினியோக திட்டத்தில் பெயர் சேர்த்தல், நீக்கம், திருத்தம், புதிய ரேஷன் கார்டு கோருதல், மொபைல் போன் எண் பதிவு மற்றும் பொது வினியோக கடைகளின் செயல்பாடுகள் குறித்த புகார்களை தீர்க்கும் வகையில் இந்த முகாம் ஏற்பாடு செய்யப்பட்டுள்ளது. நுகர்வோர் பாதுகாப்பு சட்டப்படி, பொது வினியோக திட்ட சேவைகளை அனைத்து தரப்பு மக்களுக்கும் வழங்குவதும், ரேஷன் கார்டில் உள்ள குறைகளை நிவர்த்தி செய்வதும் இதன் நோக்கமாகும்.

இன்று நாமக்கல், ராசிபுரம், மோகனூர், சேந்தமங்கலம், கொல்லிமலை, திருச்செங்கோடு, ப.வேலூர், குமாரபாளையம் ஆகிய தாசில்தார் அலுவலகங்களில் உள்ள வட்ட வழங்கல் பிரிவில், சம்பந்தப்பட்ட வட்ட வழங்கல் அலுவலர்கள் தலைமையில் காலை 10:00 மணி முதல் மதியம் 1:00 மணி வரை இந்த முகாம் நடைபெறும். பொதுமக்கள் இந்த குறைதீர்க்கும் சிறப்பு முகாமில் கலந்துகொண்டு, பொது வினியோக திட்டம் மற்றும் நுகர்வோர் பாதுகாப்பு சட்டத்தின்படி தங்கள் குறைகளை தீர்வு செய்து கொள்ள இந்த வாய்ப்பைப் பயன்படுத்திக்கொள்ளலாம் என மாவட்ட ஆட்சியர் அறிக்கையில் தெரிவிக்கப்பட்டுள்ளது.