இறந்த நாய்க்கு பிளக்ஸ் பேனர் வைத்த மக்கள்

ராசிபுரத்தில் இறந்த தெருநாய்க்கு பிளக்ஸ் போர்டு வைத்து அஞ்சலி செலுத்திய சம்பவம் ஆச்சர்யத்தை ஏற்படுத்தியுள்ளது.

நாமக்கல் மாவட்டம் ராசிபுரம் நகரில் உள்ள பட்டணம் ரோடு சக்தி விநாயகர் கோவில் அருகில் 'விக்கி' என்ற நாய் கடந்த 8 ஆண்டுகளுக்கு மேல் சுற்றி திரிந்தது. விக்கி அப்பகுதிமக்களிடம் மிகுந்த பாசத்துடன் பழகி வந்தது. இரவில் சந்தேகப்படும் வகையில் வரும் நபர்களை தெருவில் அனுமதிக்க விடாமல் கூச்சலிடுமாம். இதனால் திருடர் பயமின்றி அப்பகுதி மக்கள் நிம்மதியாக இருந்தனர்.

இந்நிலையில் கடந்த சில நாட்களாக விக்கி உடல்நலம் பாதிக்கப்பட்டிருந்த நிலையில் இருந்தது. இதனால் அப்பகுதி இளைஞர்கள், விக்கியை கால்நடை மருத்துவமனையில் சிகிச்சையளித்து வந்தனர். இருப்பினும், சிகிச்சை பலனின்றி நேற்று மாலை விக்கி இறந்துவிட்டது. இதனால் அப்பகுதி மக்கள் அதிர்ச்சியும், சோகமும் அடைந்துள்ளனர். தங்களது பகுதிக்கு காவலானாக இருந்த விக்கி இறந்த சோகத்தை தாள முடியாத அப்பகுதியினர் விக்கிக்கு கண்ணீர் அஞ்சலி பிளக்ஸ் போர்டு வைத்து மாலை அணிவித்து மரியாதை செலுத்தினர்.