நாமக்கல் அருகே விஷம் குடித்து தொழிலாளி தற்கொலை

திருச்சி மாவட்டம் துறையூர் அருகே உள்ள கோட்டப்பாளையத்தை சேர்ந்தவர் முருகேசன் (45). இவருடைய மனைவி அழகுமணி. இவர்கள் இருவரும் எருமப்பட்டி அருகே வரகூர் கோம்பையில் உள்ள ஒரு தோட்டத்தில் தங்கி தொழிலாளர்களாக வேலைபார்த்து வந்தனர். முருகேசனுக்கு கடந்த 3 மாதங்களுக்கு முன்பு குடலிறக்க அறுவை சிகிச்சை செய்யப்பட்டது. இந்த நிலையில் குடிப்பழக்கம் உள்ள முருகேசன் சம்பவத்தன்று மது குடித்ததாக தெரிகிறது. இதனால் வயிற்று வலி ஏற்பட்டு, வலி தாங்க முடியாமல் அவதிப்பட்ட அவர் விரக்தி அடைந்து வீட்டில் இருந்த விஷத்தை குடித்து விட்டார். மயங்கிக் கிடந்த முருகேசனை அக்கம் பக்கதினர் மீட்டு நாமக்கல் அரசு ஆஸ்பத்திரிக்கு கொண்டு சென்றனர். அங்கு சிகிச்சை பலனின்றி முருகேசன் பரிதாபமாக உயிரிழந்தார். இச்சம்பவம் குறித்து எருமப்பட்டி போலீசார் வழக்கு பதிவு செய்து விசாரணை நடத்தி வருகின்றனர்.