கொல்லிமலையில் சிறுத்தை அச்சுறுத்தல் இருக்கிறதா? வனத்துறை விளக்கம்!
நாமக்கல் மாவட்டம் கொல்லிமலைப் பகுதியில் சிறுத்தை நடமாட்டம் குறித்த அச்சம் தேவையற்றது என வனத்துறை அதிகாரிகள் தெளிவுபடுத்தியுள்ளனர்.
சமீபத்தில், சேந்தமங்கலம் சுற்றுவட்டாரப் பகுதிகள், கொல்லிமலை குழிவளவு மற்றும் நத்துக்குழிப்பட்டி ஆகிய பகுதிகளில் சில ஆடுகள் வயிறு கிழிக்கப்பட்ட நிலையில் காணப்பட்டன. இதனால் பொதுமக்கள் மத்தியில் சிறுத்தை அச்சம் பரவியது.
இந்நிலையில், கொல்லிமலை வனச்சரக அலுவலர் சுகுமார் தலைமையிலான குழுவினர் விரிவான ஆய்வு மேற்கொண்டனர். மலைப் பகுதியின் முக்கிய இடங்களில் சிறுத்தையின் கால் தடங்கள் அல்லது நடமாட்டத்திற்கான எந்த ஆதாரமும் காணப்படவில்லை என அவர்கள் உறுதிப்படுத்தினர்.
"சிறுத்தை தாக்குதல் என்றால், இரையை இழுத்துச் சென்றிருக்க வேண்டும். ஆனால் இங்கு அப்படி எதுவும் இல்லை. செந்நாய் அல்லது நாய்களின் தாக்குதலாக இருக்கலாம் என்பதே எங்கள் முதற்கட்ட ஆய்வின் முடிவு," என வனச்சரக அலுவலர் சுகுமார் தெரிவித்தார்.
வனத்துறையினர் தொடர்ந்து கண்காணிப்பு பணியில் ஈடுபட்டு வருவதாகவும், பொதுமக்கள் அச்சம் கொள்ள தேவையில்லை எனவும் அவர் மேலும் தெரிவித்தார்.
சம்பவம் தொடர்பாக மேலும் விரிவான விசாரணை நடைபெற்று வருவதாக வனத்துறை வட்டாரங்கள் தெரிவித்துள்ளன.
