கோம்பு பள்ளத்தை தூய்மை படுத்த வேண்டும்: பொது மக்கள் கோரிக்கை

குமாரபாளையத்தில் கோம்பு பள்ளம் தூய்மைப்படுத்த வேண்டும் என கோரிக்கை எழுந்துள்ளது.

குமாரபாளையம் பஸ் ஸ்டாண்ட் அருகே கழிவு நீர் செல்லும் கோம்பு பள்ளம் உள்ளது. இது கத்தேரி பகுதியில் தொடங்கி காவிரி ஆற்றங்கரையோரம் மணிமேகலை வீதி வரை செல்கிறது. சமீபத்தில் இந்த கோம்பு பள்ளம் கான்கிரீட் தளம் அமைத்து சீரமைக்கப்பட்டு, பள்ளத்தின் மையப் பகுதியில் கழிவுநீர் செல்லும்படி பாதை அமைக்கப்பட்டது.

நாளடைவில் அக்கம் பக்கம் உள்ளவர்கள் குப்பைகள் கொட்டுவது, அங்குள்ள இறைச்சி கடையினர் கழிவுகளை கொட்டுவது, கட்டுமான கழிவுகள் கொட்டுவது என பலரும் செய்து வருவதால், நாளடைவில் கழிவுநீர் செல்லும் பாதையில் அடைப்பு ஏற்பட்டு, பரவலாக செல்வதுடன் ஆங்காங்கே குளம் போல் கழிவுநீர் தேங்கி, சுகாதார சீர்கேடு ஏற்பட்டுள்ளது.

இதனால் உருவாகும் கொசுக்களால் அப்பகுதி குடியிருப்பு வாசிகள் பல இன்னல்களுக்கு ஆளாகி வருகின்றனர். பொதுமக்கள் துயரம் போக்க, கோம்பு பள்ளத்தை தூய்மை படுத்தி, பள்ளத்தின் மையப்பகுதியில் கழிவுநீர் எளிதில் செல்லும்படி, அடைப்புகளை நீக்க வேண்டும் கோரிக்கை எழுந்துள்ளது. மேலும் கோம்பு பள்ளத்தில் குப்பைகள் கொட்டுவோர் மீது கடும் நடவடிக்கை எடுக்க வேண்டும்.

சுகாதாரத்தைப் பொறுத்தவரை, மக்கள் தவறு செய்தாலும் அதைத் தடுத்து சுகாதாரக் கேடுகள் அரங்கேறாமல் பார்த்துக் கொள்ள வேண்டிய பொறுப்பு அரசுக்கு உண்டு. அதனால் தான் சுகாதாரத் துறையை நாம் மக்கள் நல்வாழ்வுத்துறை என்று அழைக்கிறோம். பொறுப்பைத் தட்டிக்கழிக்காமல் இந்தப் பிரச்னையில் அரசு விதிமுறைகளை நடைமுறைப்படுத்தாமல் போனால், தொற்றுநோய் பரவிப் பேரிழப்புகளை நாம் சந்திக்க நேரிடக்கூடும் என்று சமூக ஆர்வலர்கள் வேதனை தெரிவித்தனர்.