சத்தியமங்கலம்: ஆசனூரில் நலத்திட்ட உதவிகள் வழங்கிய நீலகிரி எம்பி

சத்தியமங்கலம் அருகே உள்ள ஆசனூர் வனக்கோட்டத்தில் பட்டியல் பழங்குடி மக்கள் மற்றும் மாணவ, மாணவிகளுக்கு நீலகிரி நாடாளுமன்ற உறுப்பினர் ஆ.ராசா நலத்திட்ட உதவிகளை வழங்கினார்.

ஈரோடு மாவட்டம், சத்தியமங்கலம் புலிகள் காப்பகம், ஆசனூர் வனக்கோட்டத்தில் காலநிலை மாற்றத்திற்கான தமிழ்நாடு உயிர்பன்மை பாதுகாப்பு மற்றும் பசுமையாக்கல் திட்டத்தின் கீழ் பழங்குடியினர் கிராமங்களில் பன்னிரெண்டு சூழல் மேம்பாட்டு குழுக்கள் செயல்பட்டு வருகின்றன. இக்குழுக்களைச் சார்ந்த பட்டியல் பழங்குடி மக்கள் மற்றும் மாணவ, மாணவிகளுக்கு நீலகிரி நாடாளுமன்ற உறுப்பினர் ஆ.ராசா நலத்திட்ட உதவிகளை வழங்கினார்.

முன்னதாக, ஆசனூர் வன அலுவலக வளாகம் மற்றும் கேர்மாளம் வனச்சரக அலுவலக வளாகத்தில் காலநிலை மாற்றத்திற்கான தமிழ்நாடு உயிர்பன்மை பாதுகாப்பு மற்றும் பசுமையாக்கல் திட்டத்தின் கீழ் பழங்குடியினர் மக்களுக்கு தையல் மற்றும் ஆரி எம்ப்ராய்டரி பயிற்சி மையங்களை திறந்து வைத்தார். இம்மையங்களில் அரேபாளையம், பங்களாதொட்டி, கே.கே.தொட்டி, ஓங்கல்வாடி, ஜே.ஆர்.எஸ்.புரம், வி.எம்.தொட்டி, கானக்கரை, உருளிக்குட்டை மற்றும் கெரேதொட்டி ஆகிய பழங்குடி கிராமத்தைச் சார்ந்த 40 பெண்கள் தற்போது பயிற்சி பெறுகிறார்கள்.

தொடர்ந்து, வெள்ளைதொட்டி மற்றும் செலுமிதொட்டி சூழல் மேம்பாட்டுக்குழு உறுப்பினர்களுக்கு ரூ.4.80 லட்சம் மதிப்புள்ள திருமண நிகழ்ச்சிகளுக்கு தேவையான சமையல் பாத்திரங்கள் மற்றும் சாமியானா பந்தல்கள் மற்றும் வெள்ளைத்தொட்டி கிராமத்தில் இயங்கி வரும் பழங்குடி மாணவர்களுக்கான புலிக்குட்டீஸ் மாலைப் படிப்பகத்தை பார்வையிட்டு 40 மாணவ, மாணவிகளுக்கு சீருடை, புத்தக பை மற்றும் எழுது பொருட்கள் ஆகிவற்றை வழங்கினார்.

இந்நிகழ்ச்சியில் ஆசனூர் வனக்கோட்ட துணை இயக்குநர் கு.சுதாகர் (சத்தியமங்கலம் புலிகள் காப்பகம்), சூழல் மேம்பாட்டு வனச்சரக அலுவலர் த.கவிதா, வனவர் ப.பாரதி, ஆசனூர் வனச்சரக அலுவலர் வி.சே.பாண்டிராஜ், தாளவாடி வனச்சரக அலுவலர் சு.சதீஸ், ஜீரகஹள்ளி வனச்சரக அலுவலர் மு.சக்திவேல், கேர்மாளம் வனச்சரக அலுவலர் க.வெங்கடாசலம், கேர்மாளம் வனச்சரக வனவர் பிரகாசம் ஆகியோர் கலந்து கொண்டனர்.