ஈரோடு மாவட்டத்தில் 423 மையங்களில் நாளை மாபெரும் தடுப்பூசி முகாம்

ஈரோடு மாவட்டத்தில் 25வது கட்டமாக கொரோனா தடுப்பூசி சிறப்பு முகாம் 423 மையங்களில் நாளை சனிக்கிழமை (மார்ச் 19) நடைபெறவுள்ளது.

இதுகுறித்து ஈரோடு மாவட்ட ஆட்சியர் ஹெச்.கிருஷ்ணனுண்ணி வெளியிட்ட செய்திக் குறிப்பில், தமிழகம் முழுவதும் மார்ச் 19ஆம் தேதி கொரோனா தடுப்பூசி முகாம் நடத்தப்பட்டு 18 வயதுக்கு மேற்பட்ட பொதுமக்கள் அனைவருக்கும் முதல் தவணை, இரண்டாம் தவணை தடுப்பூசி, இரண்டு தவணை தடுப்பூசி செலுத்திக்கொண்ட முன்களப் பணியாளர்கள், 60 வயதுக்கு மேற்பட்ட இணை நோய் உள்ளவர்களுக்கு முன்னெச்சரிக்கை தடுப்பூசி இலவசமாக செலுத்தப்படவுள்ளது.

ஈரோடு மாவட்டத்தில் அரசு மருத்துவமனைகள், அரசு ஆரம்ப சுகாதார நிலையங்கள், நகர்ப்புற சுகாதார மையங்கள்.பள்ளிகள் உள்பட 423 மையங்களில் காலை 9 மணி முதல் மாலை 5 மணி வரை 18 வயதுக்கு மேற்பட்ட அனைவருக்கும் முதல், இரண்டாம் தவணையாக 1.50 லட்சம் பேருக்கு கொரோனா தடுப்பூசிகள் இலவசமாக செலுத்தப்படவுள்ளது.

தடுப்பூசி முகாமில் ஈரோடு மாவட்டம் முழுவதும் 1,692 பணியாளர்கள் தடுப்பூசி செலுத்தும் பணி செய்திடவும், 56 வாகனங்கள் முகாமிற்காகவும் பயன்படுத்தப்படவுள்ளது. 15 முதல் 18 வயதுடையவர்களுக்கு கோவேக்ஸின் தடுப்பூசியும், 12 முதல் 14 வயதுடைய மாணவ-மாணவிகளுக்கு அவர்கள் படிக்கும் பள்ளிக்கூடத்தில் கொரோனா தடுப்பூசி செலுத்தப்பட்டு வருகிறது. எனவே அனைவரும் அச்சமின்றி, தயக்கமின்றி கொரோனா தடுப்பூசி செலுத்திக்கொள்ள வேண்டும். இவ்வாறு அவர் கூறினார்.