ஈரோட்டில் ரூ.10 லட்சம் மதிப்புள்ள 30 தங்க நாணயங்கள் பறிமுதல்
ஈரோடு வில்லரசம்பட்டி நால்ரோடு பகுதியில் தேர்தல் பறக்கும் படை அதிகாரி தலைமையில் பறக்கும் படையினர் வாகன சோதனையில் ஈடுபட்டு கொண்டிருந்தனர். அப்போது அந்த வழியாக வந்த ஒரு காரை நிறுத்தி சோதனை செய்தனர்.
அந்தக் காரை பவானியை சேர்ந்த சிங்காரவேலன் (41) என்பவர் ஓட்டி வந்தது தெரியவந்தது. சிங்கார வேலன் பவானியில் சொந்தமாக நகைக்கடை வைத்துள்ளார். காரை சோதனை செய்ததில் ரூ. 10 லட்சம் மதிப்பிலான 30 தங்க நாணயங்கள் இருந்ததை பறக்கும் படையினர் கண்டுபிடித்தனர்.
இந்த தங்க நாணயங்களுக்கு உரிய ஆவணங்கள் சிங்காரவேலனிடம் இல்லை.இந்த தங்க நாணயங்களை ஈரோட்டில் உள்ள ஒருவருக்கு எடுத்துச் சென்றதாக அவர் கூறினார். இதையடுத்து தேர்தல் பறக்கும் படையினர் 30 தங்க நாணயங்களை பறிமுதல் செய்து ஈரோடு மேற்கு தொகுதி தேர்தல் நடத்தும் அலுவலர் சைபுதீனிடம் ஒப்படைத்தனர். இந்த தங்க நாணயத்துக்குரிய ஆவணங்களை காண்பித்து பெற்று செல்லலாம் என அதிகாரிகள் தெரிவித்தனர்.
