பட்டப்பகலில் பிரபல ரவுடிகள் வெட்டிக்கொலை

ஈரோட்டில் பட்டப்பகலில் பிரபல ரவுடிகள் இரண்டு பேரை மர்ம நபர்கள் வெட்டிக்கொலை செய்துள்ள சம்பவம் பெரும் பரபரப்பை ஏற்படுத்தியுள்ளது.

ஈரோடு அருகே கிருஷ்ணம்பாளையம் பகுதியைச் சேர்ந்தவர் கலைச்செல்வன் (30). கருங்கல்பாளையம் செங்குட்டுவன் வீதியை சேர்ந்த குணசேகரன் (38). இவர்கள் இருவரும் கடந்த 2018ம் ஆண்டு கருங்கல்பாளையத்தில் நடந்த ஒரு கொலை வழக்கில் தொடர்புடையவர்கள். இந்நிலையில் இன்று இந்த வழக்கு தொடர்பாக கலைச்செல்வன் மற்றும் குணசேகரன் உட்பட 10 பேர் ஈரோடு நீதிமன்றத்தில் ஆஜராகிவிட்டு பின்னர் 10 பேரும் ஈரோடு வீரப்பன்சத்திரம் சிதம்பரனார் வீதி பகுதிக்கு வந்துள்ளனர்.அங்கு வைத்து மது அருந்திக் கொண்டு இருந்தபோது அவர்களுக்குள் தகராறு ஏற்பட்டதாக தெரிகிறது. தகராறு முற்றிய நிலையில் கலைச்செல்வன், குணசேகரன் ஆகிய இருவரையும் அரிவாளால் வெட்டியும், கல்லால் தாக்கியும் கொலை செய்துவிட்டு அவர்களுடன் இருந்தவர்கள் அங்கிருந்து தப்பிச் சென்றுவிட்டனர்.

இந்த கொலைச் சம்பவம் குறித்து தகவலறிந்த ஈரோடு டவுன் டிஎஸ்பி ராஜு தலைமையிலான காவல்துறையினர் சம்பவ இடத்திற்கு வந்து இருவரின் உடலையும் மீட்டு பிரேத பரிசோதனைக்காக ஈரோடு அரசு தலைமை மருத்துவமனைக்கு அனுப்பி வைத்தனர். மேலும் கொலையாளிகள் குறித்தும் கொலைக்கான காரணம் குறித்தும் விசாரணை மேற்கொண்டு வருகின்றனர். பட்டப்பகலில் நடந்த இந்த கொலை சம்பவம் ஈரோட்டில் பெரும் பரபரப்பை ஏற்படுத்தியுள்ளது.