கொரோனா தொற்று: மகப்பேறு மருத்துவமனைக்கு பூட்டு

ஈரோடு காந்திஜி ரோட்டில் மாநகராட்சி மகப்பேறு மருத்துவமனை உள்ளது. இங்கு கர்ப்பிணி பெண்களுக்கு சிகிச்சை மேற்கொள்ளப்பட்டு வருகிறது. மருத்துவமனையில் ஒருபுறம் கொரோனா பரிசோதனையும், மற்றொரு புறம் கொரோனா தடுப்பூசியும் போடப்பட்டு வருகிறது.

இம் மருத்துவமனைக்கு ஈரோடு மாநகராட்சி மற்றும் சுற்றுப்புற பகுதியை ஏராளமான மக்கள் தினசரி வந்து செல்கின்றனர். மகப்பேறு மருத்துவமனையில் சிகிச்சைக்கு அனுமதிக்கப்பட்டிருந்த இரு கர்ப்பிணிகளுக்கு கொரோனா தொற்று உறுதி செய்யப்பட்டது.

அப்பெண்களை பெருந்துறை மருத்துவக்கல்லூரி மருத்துவமனையில் அனுமதித்துள்ளனர். மருத்துவமனையில் இருந்த பிற கர்ப்பிணிகள், நோயாளிகள் அருகிலுள்ள அரசு மருத்துவமனையில் அனுமதிக்கப்பட்டனர். மருத்துவமனையில் நோய் தடுப்பு நடவடிக்கையாக கிருமி நாசினி தெளிக்கப்பட்டு, மருத்துவமனை தற்காலிகமாக மூடப்பட்டது. மருத்துவமனை வளாகத்தில் செயல்பட்டு வந்த கொரோனா தடுப்பூசி மையம், கொரோனா பரிசோதனை மையமும் தற்காலிகமாக நிறுத்தி வைக்கப்பட்டது. மருத்துவமனை மீண்டும் 24ம் தேதி திறக்கப்படும் என தெரிவிக்கப்பட்டுள்ளது.