ஈரோடு மாவட்டத்தில் 9 பேரூராட்சி கவுன்சிலர்கள் பதவிக்கு இடைத்தேர்தல்: மின்னணு வாக்குப்பதிவு இயந்திரங்கள் முதற்கட்டமாக சரிபார்ப்பு: ஆட்சியர் ஆய்வு!

ஈரோடு மாவட்டத்தில் 9 பேரூராட்சி கவுன்சிலர்கள் பதவிக்கான இடைத்தேர்தலை முன்னிட்டு, மின்னணு வாக்குப்பதிவு இயந்திரங்கள் முதற்கட்டமாக சரிபார்க்கும் பணி நடைபெற்றதை மாவட்ட ஆட்சியர் ராஜ கோபால் சுன்கரா பார்வையிட்டு ஆய்வு மேற்கொண்டார்.

ஈரோடு மாவட்டத்தில் அந்தியூர் பேரூராட்சி 17-வது வார்டு, பவானிசாகர் பேரூராட்சி 11-வது வார்டு, சென்னசமுத்திரம் பேரூராட்சி 7-வது வார்டு, கருமாண்டிசெல்லிபாளையம் பேரூராட்சி 2-வது வார்டு. கிளாம்பாடி பேரூராட்சி 10-வது வார்டு, கூகலூர் பேரூராட்சி 3-வது. 5-வது வார்டுகள், பள்ளபாளையம் பேரூராட்சி 11-வது வார்டு, வாணிபுத்தூர் பேரூராட்சி 4-வது வார்டு ஆகிய 9 கவுன்சிலர்களின் பதவிக்கு இடைத்தேர்தல் நடைபெற உள்ளது.

இதை முன்னிட்டு மின்னணு வாக்குப்பதிவு இயந்திரங்களை முதற்கட்டமாக சரிபார்க்கும் பணி ஈரோடு மாவட்ட ஆட்சியர் அலுவலக கூட்டரங்கில் கடந்த 2 நாட்களாக நடந்து வந்தது. இந்த பணியை மாவட்ட ஆட்சியர் ராஜ கோபால் சுன்கரா நேற்று நேரில் பார்வையிட்டு ஆய்வு மேற்கொண்டார். அப்போது, மாவட்ட ஆட்சியரின் நேர்முக உதவியாளர் (வளர்ச்சி) செல்வராஜ், பெல் நிறுவன பொறியாளர்கள் உட்பட தொடர்புடைய துறை அதிகாரிகள் உடனிருந்தனர்.