அந்தியூரில் 100 சதவீத வாக்களிப்பை வலியுறுத்தி நூதன முறையில் விழிப்புணர்வு

அந்தியூர் பகுதியில் 100 சதவீத வாக்களிப்பை வலியுறுத்தி திருமண அழைப்பிதழ் போல் அச்சிட்டு நூதன முறையில் விழிப்புணர்வு ஏற்படுத்தப்பட்டது.

தமிழகத்தில் வருகிற 19ம் தேதி நாடாளுமன்ற தேர்தல் ஒரே கட்டமாக நடைபெற உள்ளது. இந்நிலையில், வாக்குப்பதிவுக்கு இன்னும் 6 நாட்களே உள்ள நிலையில் அரசியல் கட்சி தலைவர்கள், பிரமுகர்கள், தொண்டர்கள் தீவிர பிரசாரத்தில் ஈடுபட்டு வருகின்றனர். மேலும் தேர்தல் ஆணையமும் 100 சதவீதம் வாக்களிப்பை வலியுறுத்தி பல்வேறு விழிப்புணர்வு நிகழ்ச்சிகளை நடத்தி வருகிறது.

அந்த வகையில், ஈரோடு மாவட்டத்தில் உள்ள அந்தியூர் சட்டமன்ற தொகுதிக்கு உட்பட்ட அந்தியூர், அத்தாணி, பிரம்மதேசம், வேம்பத்தி, பர்கூர், எண்ணமங்கலம், கெட்டிசமுத்திரம், அத்தாணி, நகலூர், பர்கூர் உள்பட பல்வேறு கிராமங்களில் 100 சதவீத வாக்களிப்பை வலியுறுத்தி வருவாய்த்துறையினர் நூதன முறையில் விழிப்புணர்வு ஏற்படுத்தி வருகின்றனர். அதாவது, திருமண அழைப்பிதழ் போல் "தேர்தல் திருவிழா அழைப்பிதழ்" என அச்சிட்டு வீடு, வீடாக சென்று, பொதுமக்களிடம் வழங்கி கட்டாயம் வாக்களிக்க வருமாறு அழைப்பு விடுத்தனர்.

இந்திய தேர்தல் ஆணையம் நடத்தும் நாடாளுமன்றத் தேர்தல் திருவிழா தங்கள் அருகாமையில் உள்ள வாக்குச்சாவடியில் நடைபெறுகிறது. இவ்விழாவில் தாங்கள் தங்கள் சுற்றமும் நட்பும் சூழ வருகைதந்து தவறாமல் தங்களது வாக்கினை பதிவு செய்து நமது மாவட்டத்தில் 100 சதவீத வாக்குப்பதிவு நடத்தி தங்கள் உரிமையை நிலை நாட்டிட அன்புடன் அழைக்கிறோம் என அந்த அழைப்பிதழில் தெரிவிக்கப்பட்டு இருந்தது. இது பொதுமக்களை வெகுவாக கவர்ந்துள்ளது.