அந்தியூர் அருகே 11-ம் வகுப்பு மாணவி மாயம்

ஈரோடு மாவட்டம் அந்தியூர் புதுமேடு பகுதியை சேர்ந்தவர் வெங்கிடுசாமி. இவரது மனைவி சுசிலா. இவர்களுக்கு 2 மகள்கள், ஒரு மகன் உள்ளனர். இவர்களது மூத்த மகள் பூமணி (வயது 16). இவர் அந்தியூர் அரசு பள்ளியில் 11-ம் வகுப்பு படித்து வருகிறார். இந்த நிலையில் கோபி அருகே உள்ள கூகலூரில் உள்ள சுசிலாவின் உறவினர் வீட்டில் பூமணியை விட்டு விட்டு வெங்கிடுசாமி மற்றும் அவரது மனைவி சுசிலா இருவரும் வெளியூர் சென்றனர்.

இந்நிலையில் பூமணி வெளியே சென்று வருவதாக கூறி வீட்டை விட்டு வெளியே சென்றார். ஆனால் நீண்ட நேரமாகியும் அவர் வீட்டுக்கு வரவில்லை. இதுகுறித்து அவரது தாய் சுசிலாவுக்கு தகவல் தெரிவிக்கப்பட்டது. அவர் வீட்டுக்கு வந்து அக்கம் பக்கம் மற்றும் உறவினர் வீடுகளில் தேடி பார்த்தார். ஆனால் பூமணி பற்றி எந்த தகவலும் கிடைக்க வில்லை. இது குறித்து சுசிலா தனது மகளை காணவில்லை என கோபி போலீசில் புகார் செய்தார். போலீசார் வழக்குபதிவு செய்து விசாரணை நடத்தி வருகின்றனர்.