வால்பாறையில் கொரோனா சிகிச்சை மையம் அமைக்க கோரிக்கை

கோவை மாவட்டத்தில் நாளுக்கு நாள் கொரோனா பாதிப்புகளும், உயிரிழப்புகளும் அதிகரித்து வருகின்றன. வால்பாறை பகுதியிலும் கொரோனா தொற்று தீவிரமாக பரவி வருகிறது. வால்பாறை பகுதியில் உள்ள பொதுமக்கள் மற்றும் தேயிலை தோட்டப் பணியாளர்கள் கொரோனா பாதிப்பு ஏற்பட்டால், பொள்ளாச்சி அல்லது கோவைக்கு சிகிச்சைக்காக செல்ல வேண்டிய நிலை உள்ளது. இந்நிலையில் வால்பாறையில் கொரோனா சிகிச்சை மையம் அமைக்க வேண்டும் என இந்திய கம்யூனிஸ்ட் கட்சியை சேர்ந்த முன்னாள் எம்.எல்.ஏ. ஆறுமுகம் வலியுறுத்தியுள்ளார்.

இதுதொடர்பாக அவர் வெளியிட்டுள்ள அறிக்கையில், 'வால்பாறை அரசு மருத்துவமனையில் போதிய வசதிகள் இல்லை. இதனால் கொரோனா நோயாளிகள் 64 கிலோ மீட்டரில் உள்ள பொள்ளாச்சிக்கும், 100 கிலோ மீட்டர் தொலைவில் உள்ள கோவைக்கும் செல்ல வேண்டிய நிலை உள்ளது. வால்பாறையில் கொரோனா தொற்று பரவி வருவதால், வால்பாறை அரசு கல்லூரியை கொரோனா சிகிச்சை மையமாக மாற்ற வேண்டும்' என அவர் தெரிவித்துள்ளார்.