பொள்ளாச்சி அருகே பாலத்தில் இருந்து கார் கவிழ்ந்து விபத்து - ஒருவர் உயிரிழப்பு

கோவை ராமநாதபுரத்தை சேர்ந்தவர் ஸ்ரீகாந்த் (34). நண்பர்களுடன் பொள்ளாச்சி வந்து, தங்கும் விடுதியில் இருந்துள்ளார். அங்கு மது அருந்தியதாக தெரிகிறது. பின்னர் நண்பர்களுடன் தனது சொகுசு காரை எடுத்துக்கொண்டு பொள்ளாச்சியில் இருந்து வடக்கிபாளையம் சாலையில் சென்றார்.

பொன்னாபுரம் பிரிவு வரை சென்றுவிட்டு மீண்டும் காரில், ஸ்ரீகாந்த் மற்றும் நண்பர்கள், பொள்ளாச்சி நோக்கி வந்துள்ளனர். அப்போது, வடக்கிபாளையம் பிரிவு மேம்பாலத்தில் மோதி, கார் விபத்துக்குள்ளானது. இந்த விபத்தில் கார் பாலத்தில் இருந்து 40 அடி பள்ளத்தில் கீழே விழுந்தது.

விபத்தில், சம்பவ இடத்திலேயே ஸ்ரீகாந்த் உயிரிழந்தார். அவருடன் காரில் இருந்த பொள்ளாச்சி மகாலட்சுமி நகரை சேர்ந்த கோபிநாத் (26), கோவை சபரிபாளையத்தை சேர்ந்த கெளசிக் (26), கோவை ராமநாதபுரத்தை சேர்ந்த கார்த்திக் கண்ணன்(27) ஆகியோர் படுகாயமடைந்தனர்.

மேம்பாலத்தில் இருந்து கீழே விழுந்ததில் ஓய்வு பெற்ற ஆசிரியர் சண்முகசுந்தரம் என்பவரின் வீட்டு முகப்பில் கார் விழுந்துள்ளது. இதில் வீட்டின் சுற்றுச்சுவர் லேசாக சேதமடைந்துள்ளது. இதுகுறித்து பொள்ளாச்சி தாலுகா போலீசார் விசாரணை நடத்தி வருகின்றனர்.