குற்ற சம்பவங்களை தடுக்கும் வகையில் பேரூராட்சியில் சிசிடிவி கேமரா :கலெக்டர் துவக்கம்

கோவை மாவட்டம் சூலூர் ஒன்றியத்துக்கு உட்பட்ட மோப்பிரிபாளையம் பேரூராட்சியில் சசிகுமார் என்பவர் சுயேச்சையாக போட்டியிட்டு வெற்றி பெற்று தலைவராக இருந்து வருகிறார்.

மோப்பிரிபாளையம் பேரூராட்சியில் குற்ற சம்பவங்களை தடுக்கும் வகையில் அந்த பகுதிகள் முழுவதும் சி.சி.டி.வி கண்காணிப்பு கேமராக்கள் பொருத்தப்பட்டு உள்ளது.

இதன்மூலம் பேரூராட்சிக்கு உட்பட்ட சுமார் 6 கி.மீ. சுற்றளவில் முக்கிய இடங்கள் மற்றும் தெருக்கள் உள்பட 100 இடங்களில் நடக்கும் சம்பவங்களை பேரூராட்சியில் உள்ள கண்காணிப்பு அறையின் பெரிய திரைகளில் பார்க்க முடியும். இதன்மூலம் அந்த பகுதியில் குற்றங்களின் எண்ணிக்கையை குறைக்க நடவடிக்கை எடுக்கப்பட்டு உள்ளது.

முன்னதாக சுமார் ரூ.30 லட்சம் மதிப்பீட்டில் அமைக்கப்பட்டு உள்ள கண்காணிப்பு கேமராக்கள் பயன்பாட்டுக்கு வந்தது. இதற்கான விழாவில் கோவை மாவட்ட ஆட்சியர் கிரந்திகுமார் பாடி கலந்து கொண்டு தொடங்கி வைத்தார். மேலும் பேரூராட்சியில் புதிதாக அமைக்கப்பட்ட நூலகமும் திறந்து வைக்கப்பட்டது.

பின்னர் நிகழ்ச்சியில் பேசிய மாவட்ட ஆட்சியர் கிரந்திகுமார் கூறுகையில், அனைத்து கிராமங்களிலும் கண்காணிப்பு கேமராக்கள் பொருத்த வேண்டும், மேலும் பொதுமக்கள் வீடுகளிலும் கண்காணிப்பு கேமரா பொருத்த முன்வர வேண்டும். சி.சி.டி.வி கண்காணிப்பு கேமராக்கள் அமைக்கப்படுவதால் சம்பந்தப்பட்ட பகுதிகளில் குற்றங்கள் குறைய வாய்ப்புகள் உண்டு என கூறினார்.

பின்னர் மாவட்ட ஆட்சியர் செய்தியாளர்களுக்கு அளித்த பேட்டியில், மோப்பிரிபாளையம் பேரூராட்சியில் தனியார் பங்களிப்போடு 100 சி.சி.டி.வி கண்காணிப்பு கேமராக்கள் அமைக்கப்பட்டு உள்ளன. இதனால் அந்த பகுதியில் குற்றங்கள் நடை பெறுவதை எளிதாக கண்டறிய முடியும்.

கோவையில் ஒரு பேரூராட்சியில் முதன்முறையாக இந்த திட்டம் கொண்டு வரப்பட்டு உள்ளது மகிழ்ச்சி அளிக்கிறது. இந்த பேரூராட்சியில் கட்டணமில்லா இலவச சேவை மையம், நூலகம் என முன்னோடி திட்டங்கள் கொண்டுவரப்பட்டு உள்ளன.

மேலும் செல்போன் செயலி மூலம் நீர்த்தேக்க தொட்டியில் தண்ணீர் நிரம்புவது கண்காணிக்கப்பட்டு வருகிறது, கோவையில் உள்ள அனைத்து பகுதிகளும் திடக்கழிவு மேலாண்மை சவாலான ஒன்றாக இருந்து வருகிறது. இதற்காக மாவட்ட நிர்வாகம் சார்பில் பல்வேறு திட்டங்கள் செய்யப்பட்டு வருகிறது.

தீபாவளி பண்டிகைக்கு சிறப்பு பேருந்துகள் இயக்குவது தொடர்பாக மாவட்ட நிர்வாகம் சார்பில் அறிக்கை தரப்பட்டு உள்ளது. தேவைப்படும் பட்சத்தில், கூடுதல் பேருந்துகள் இயக்க நடவடிக்கை மேற்கொள்ளப்படும்

இவ்வாறு அவர் கூறினார்.

நிகழ்ச்சியில் பேரூராட்சிகள் இயக்குனர் துவகராநாத்சிங், கருமத்தம்பட்டி காவல் ஆய்வாளர் அன்னம் மற்றும் வார்டு உறுப்பினர்கள், பொதுமக்கள் உள்ளிட்ட பலர் கலந்து கொண்டனர்.