நானும் அரசியலில் தான் இருக்கிறேன்.. கோவையில் நடிகர் விஷால் பேட்டி...

செல்லமே படத்தின் மூலம் தமிழ் திரையுலகில் அறிமுகமான நடிகர் விஷால், தொடர்ந்து, சண்டக்கோழி, வெடி, தாமிரபரணி உள்ளிட்ட பல படங்களில் நடித்து உள்ளார். தற்போது, அறிமுக இயக்குனர் வினோத்குமார் இயக்கத்தில் லத்தி என்ற படத்தில் நடிகர் விஷால் நடித்து வருகிறார்.

லத்தி திரைப்படம் டிசம்பர் 22 ஆம் தேதி வெளியாகிறது. இதனை முன்னிட்டு, தமிழகம் முழுவதும் பல்வேறு பகுதிகளுக்கு சென்று லத்தி படம் குறித்து நடிகர் விஷால் பேசி வருகிறார். இதன் தொடர்ச்சியாக, நடிகர் விஷால், இசையமைப்பாளர் யுவன் சங்கர் ராஜா மற்றும் லத்தி திரைப்பட குழுவினர் கோவை நவ இந்தியா பகுதியில் உள்ள தனியார் கல்லூரியில் நடைபெற்ற நிகழ்ச்சியில் பங்கேற்றனர்.

அப்போது, லத்தி திரைப்படத்தின் டிரையிலர் திரையிடப்பட்டது. இந்த நிகழ்ச்சியில் 500-க்கும் மேற்பட்ட மாணவர்கள் கலந்து கொண்டு ஆடியும் பாடியும் தங்களது தனித்திறமைகளை வெளிப்படுத்தினர்.இதனைத் தொடர்ந்து நடிகர் விஷால், இசையமைப்பாளர் யுவன் ஷங்கர் ராஜா ஆகியோர் மேடையில் மாணவர்கள் முன்பு தோன்றி அவர்களிடம் கலந்துரையாடினர்.

தொடர்ந்து நடிகர் விஷால் செய்தியாளர்களிடம் கூறியதாவது:

லத்தி திரைப்படம் டிசம்பர் 22 ஆம் தேதி லத்தி உலகமெங்கும் வெளியாகிறது. இந்தி மொழியில் டிசம்பர் 30 ஆம் தேதி வெளியாகிறது. ஒவ்வொரு ஊராக சென்று ரசிகர்களை சந்தித்து வருகிறோம். இந்த திரைப்படத்தில் முதல் முறையாக ஒரு இரண்டாம் நிலை காவலராக 8 வயது சிறுவனின் தந்தையாக நடித்துள்ளேன்.

விவசாயிகளின் கல்வி மற்றும் மருத்துவ உதவிக்காக தொடர்ந்து பல்வேறு உதவிகளை செய்து வருகிறேன். விவசாயிகள் குறித்து சரியான திரைப்படம் இதுவரை வெளியாகவில்லை. அவர்களது பிரச்சனைகள் குறித்து தெரிவிப்பது மட்டுமல்லாமல் அதற்கான தீர்வுகளையும் திரைப்படத்தில் கூற வேண்டும்.

எனது நண்பரான உதயநிதி ஸ்டாலின் அமைச்சரானது எனக்கு மகிழ்ச்சி அளிக்கிறது. இப்போது தான் அவர் தனது தந்தை பெயரை பயன்படுத்தி இருக்கிறார். ஆனால், அவர் வெறும் உதய் என்ற பெயரில் இருந்த போதில் இருந்தே எனக்கு தெரியும். மக்களுக்காக சேவை செய்து வருவதும் அரசியல் தான் என்ற அடிப்படையில் நானும் அரசியலில் தான் இருக்கிறேன்.

சிறிய பட்ஜெட் படங்கள் திரையரங்குகளில் வெளியாகும் போது மக்கள் அங்கு செல்வது குறைவதால் சிறிய திரைப்படங்கள் நஷ்டத்தை சந்திக்கின்றன. இலங்கை அகதிகள் முகாமில் எனது திரைப்படங்களை திரையிட நினைக்கிறேன். ஆனால் ஒவ்வொரு முறையும் நிராகரிக்கப்பட்டு வருகிறது.

அடுத்தடுத்த படங்களில் நடித்து வருவதால் முன்னணி நடிகர்களுடன் இணைந்து நடிக்க வாய்ப்பு இல்லை. திருமணம் குறித்து தற்போது முடிவு எடுக்கவில்லை. விரைவில் அதுகுறித்து அறிவிக்கிறேன் என்று நடிகர் விஷால் தெரிவித்தார்.