புதைப்பதற்கு அனுமதி மறுத்ததால் பிணத்துடன் பொதுமக்கள் சாலை மறியல்

திருவண்ணாமலை அருகே உள்ள வடமாத்தூர் கிராமத்திற்கு உட்பட்ட அண்ணாமலை கொட்டா பகுதியில் 300-க்கும் மேற்பட்ட குடும்பங்கள் வசித்து வருகிறது. இப்பகுதியை சேர்ந்தவர்கள் வடமாத்தூரில் இருந்து கண்ணகுருக்கை செல்லும் சாலையில் பல ஆண்டு காலமாக குறிப்பிட்ட இடத்தை மயானமாக பயன்படுத்தி வந்தனர்.

இந்த நிலையில் இந்த மயான இடம் நீர்ப்பிடிப்பு பாதையில் அமைந்துள்ளதாக கூறி அந்த இடத்தை மயானமாக பயன்படுத்தக்கூடாது என்று மாவட்ட நிர்வாகம் உத்தரவிட்டுள்ளது. அதற்கு பதிலாக அப்பகுதி மக்களுக்கு சுடுகாட்டிற்கு மாற்று இடம் வழங்கப்படவில்லை என்று கூறப்படுகிறது.

இந்த நிலையில் நேற்று  காலை அதே பகுதியை சேர்ந்த மூதாட்டி உடல்நல குறைவால் இறந்துள்ளார். அவருடைய இறுதிச்சடங்கு  நடைபெற்றது. பின்னர் மூதாட்டியின் உடலை அடக்கம் செய்வதற்காக ஏற்கனவே பயன்படுத்தி வந்த மயானத்திற்கு உறவினர்கள் மற்றும் ஊர் மக்கள் நேற்று மாலை ஊர்வலமாக எடுத்து சென்று உள்ளார்.

இதுகுறித்து தகவலறிந்த வருவாய்த்துறையினர் மற்றும் ஊரக வளர்ச்சித்துறை அதிகாரிகள் மூதாட்டியின் உடலை இந்த இடத்தில் அடக்கம் செய்யக்கூடாது என்று தெரிவித்து உள்ளனர்.  இதனால் ஆத்திரமடைந்த கிராம மக்கள் மூதாட்டியின் உடலை வடமாத்தூர்-கண்ணகுருக்கை சாலையில் வைத்து மறியல் போராட்டத்தில் ஈடுபட்டனர்.

செங்கம் தாசில்தார் முனுசாமி, திருவண்ணாமலை தாலுகா போலீஸ் இன்ஸ்பெக்டர் கோவிந்தசாமி மற்றும் போலீசார் சம்பவ இடத்திற்கு வந்து மறியலில் ஈடுபட்ட பொதுமக்களிடம் பேச்சுவார்த்தை நடத்தினர். 

தொடர்ந்து இறந்த மூதாட்டியின் உடலை ஏற்கனவே பயன்படுத்தி வந்த மயானத்தில் அடக்கம் செய்யவும், ஒரு வாரத்தில் மயான இடம் தொடர்பாக ஊர் மக்களிடம் சமாதான பேச்சுவார்த்தை நடத்துவதாக வருவாய்த்துறை அதிகாரிகள் உத்தரவாதம் அளித்ததின் பேரில் பொதுமக்கள் சாலை மறியலை கைவிட்டு கலைந்து சென்றனர்.

பின்னர் அவர்கள் மூதாட்டியின் 2 மணி நேரத்திற்கு மேல் நடைபெற்ற சமாதான பேச்சுவார்த்தைக்குப் பிறகு  உடலை இரவுஅடக்கம் செய்தனர்.