மரத்தில் பைக் மோதி, தொழிலாளி பலி

கோவை மாவட்டம், பொள்ளாச்சி தாலுாகா நெகமம் சேரிப்பாளையத்தை சேர்ந்தவர் அருண்குமார் (வயது 26). தேங்காய் உரிக்கும் தொழிலாளி. இவருக்கு திருமணமாகி பிரியதர்ஷினி என்ற மனைவி உள்ளார். இந்நிலையில் நேற்று முன்தினம் உடுமலையில் நடந்த உறவினர் வீட்டுத் திருமணத்தில் கலந்து கொள்வதற்காக, அருண்குமார் பைக்கில் உடுமலை வந்தார்.

திருமண நிகழ்ச்சியில் கலந்து விட்டு, நேற்று அதிகாலை பைக்கில், சேரிப்பாளையம் வந்து கொண்டிருந்தார். உடுமலை- பெதப்பம்பட்டி ரோட்டில், குறுஞ்சேரி பாலம் அருகே வந்த போது எதிர்பாராத விதமாக, ரோட்டின் வலதுபுறம் இருந்த மரத்தில் பைக் மோதியது. இதில் தூக்கி வீசப்பட்ட அருண்குமார், தலையில் பலத்த காயமடைந்த நிலையில் உயிரிழந்தார்.

விபத்து குறித்து, உடுமலை போலீசார் வழக்குப்பதிவு செய்து விசாரிக்கின்றனர்.