திருப்பூரில் புத்தகத் திருவிழா; மாணவா்களுக்கு வரும் ஞாயிறு அன்று திறனாய்வு போட்டிகள்

Tirupur News,Tirupur News Today- திருப்பூரில் 20-வது புத்தகத் திருவிழாவை முன்னிட்டு மாணவ, மாணவிகளுக்கான கலை, இலக்கிய திறனாய்வு போட்டிகள் ஞாயிற்றுக்கிழமை (ஜனவரி 7) நடத்தப்படுகின்றன.

தமிழக அரசு, திருப்பூா் மாவட்ட நிா்வாகம், திருப்பூா் பின்னல் புக் டிரஸ்ட் நடத்தும் 20-வது திருப்பூா் புத்தகத் திருவிழா காங்கயம் சாலை வேலன் ஓட்டல் வளாகத்தில் ஜனவரி 25-ம் தேதி முதல் பிப்ரவரி 4-ம் தேதி வரை நடைபெறவுள்ளது.

புத்தகத் திருவிழாவை முன்னிட்டு மாணவ, மாணவிகளுக்கு கலை இலக்கிய திறனாய்வுப் போட்டிகள் ஆண்டுதோறும் நடத்தப்பட்டு வருகின்றன. அதன்படி, நடப்பாண்டுக்கான போட்டிகள் 26 இடங்களில் ஜனவரி 7-ம் தேதி நடைபெறவுள்ளன.

போட்டி பிரிவுகள், தலைப்புகள்: 1 முதல் 5 -ம் வகுப்பு, 6 முதல் 8 -ம் வகுப்பு, 9 முதல் 12 -ம் வகுப்பு வரை என 3 பிரிவுகளில் போட்டிகள் நடத்தப்படுகின்றன.

1 முதல் 5 -ம் வகுப்பு வரையிலான மாணவா்கள் ‘என்னுடைய வீடு, தேசத் தலைவா்கள், எனது வகுப்பறை, வன விலங்குகள்’ ஆகிய தலைப்புகளில் ஏதேனும் ஒரு தலைப்பில் ஓவியம் வரைய வேண்டும்.

6 முதல் 8 -ம் வகுப்பு வரையிலான மாணவா்களுக்கு ‘ மழை வெள்ளம், சந்திராயன், பிடித்த விளையாட்டு, பொங்கலோ பொங்கல்’ ஆகிய தலைப்புகளில் ஏதேனும் ஒன்றில் ஓவியம் வரைய வேண்டும்.

இதே பிரிவில் கட்டுரைப் போட்டிக்கு ‘குப்பையில்லா ஊா், பூமி பந்தை காப்போம், ஆண்ட்ராய்டு அரக்கன், வெற்றி தோல்வி’ என்ற தலைப்புகளில் ஏதேனும் ஒரு தலைப்பில் கட்டுரை எழுத வேண்டும்.

9 -ம் வகுப்பு முதல் 12 -ம் வகுப்பு வரையிலான மாணவா்களுக்கு ஓவியப் போட்டிக்கு ‘என்னை கவா்ந்த கேலிச்சித்திரம், குருவிக்கூடு, சிங்கப்பெண்ணே, பசுமை தேசம்’ ஆகிய தலைப்புகள் கொடுக்கப்பட்டுள்ளன.

இப்பிரிவில் கட்டுரைப் போட்டிக்கு ‘சரித்திரம் தோ்ச்சி கொள், போரிடும் உலகத்தை வேரறுப்போம், இணையமும்; இன்றைய தலைமுறையும், உலகை உலுக்கும் காலநிலை மாற்றம்’ ஆகிய தலைப்புகளில் ஏதேனும் ஒன்றில் கட்டுரை எழுத வேண்டும்.

இதே பிரிவில் கவிதைப் போட்டிக்கு, போட்டி நடைபெறும் நாளில் அந்தந்த மையத்தில் காலை 10 மணி அளவில் கவிதைப் போட்டிக்கான தலைப்புகள் வழங்கப்படும் என்று புத்தகத் திருவிழா குழுவினா் தெரிவித்துள்ளனா்.

                                                                                              புத்தக கண்காட்சி (கோப்பு படம்)

போட்டி நடைபெறும் இடங்கள்: திருப்பூா் வடக்குப் பகுதியில் திருப்பூா் குமாா் நகா் மேல்நிலைப் பள்ளி, என்ஆா்கே புரம் மேல்நிலைப் பள்ளி, நெசவாளா் காலனி உயா்நிலைப் பள்ளி, வாவிபாளையம் அரசு உயா்நிலைப் பள்ளி, பெருமாநல்லூா் அரசுப் பெண்கள் மேல்நிலைப் பள்ளி, மாஸ்கோ நகா் உயா்நிலைப் பள்ளி, 15 வேலம்பாளையம் நடுநிலைப் பள்ளி, திருப்பூா் தெற்குப் பகுதியில் திருப்பூா் ஜெய்வாபாய் நகரவைப் பெண்கள் மேல்நிலைப் பள்ளி, நொய்யல் வீதி உயா்நிலைப் பள்ளி, வீரபாண்டி மேல்நிலைப் பள்ளி, இடுவம்பாளையம் அரசு மேல்நிலைப் பள்ளி, நல்லூா் நடுநிலைப் பள்ளி, கே.செட்டிபாளையம் அரசு உயா்நிலைப் பள்ளி, பெரிச்சிபாளையம் அரசு உயா்நிலைப் பள்ளி ஆகிய இடங்களில் போட்டிகள் நடைபெறவுள்ளன.

இத்துடன் அவிநாசி அரசுப் பெண்கள் மேல்நிலைப் பள்ளி, ஊத்துக்குளி அரசு ஆண்கள் மேல்நிலைப் பள்ளி, பல்லடம் அரசுப் பெண்கள் மேல்நிலைப் பள்ளி, பொங்கலூா் பி.வி.கே.என் மேல்நிலைப் பள்ளி, காங்கேயம் பழையகோட்டை ரோடு ஊராட்சி ஒன்றிய நடுநிலைப் பள்ளி, தாராபுரம் என்சிபி மேல்நிலைப் பள்ளி, வெள்ளக்கோயில் கரூா் ரோடு ஊராட்சி ஒன்றிய நடுநிலைப் பள்ளி, மூலனூா் அரசு மேல்நிலைப் பள்ளி, குண்டடம் அரசு மேல்நிலைப் பள்ளி, உடுமலைப்பேட்டை தளி ரோடு அரசு ஆண்கள் மேல்நிலைப் பள்ளி, குடிமங்கலம் அரசு மேல்நிலைப் பள்ளி, மடத்துக்குளம் அரசு மேல்நிலைப் பள்ளி ஆகிய இடங்களிலும் போட்டிகள் நடைபெறவுள்ளன.

போட்டிகளில் வெற்றிபெறுவோருக்கு முதல் பரிசு ரூ.500, இரண்டாம் பரிசு ரூ.300, 3-வது பரிசு ரூ. 200 ரொக்கம் வழங்கப்படும். அத்துடன் நினைவு பரிசுகளும் வழங்கப்படும். ஜனவரி 30-ம் தேதி மாலை புத்தகத் திருவிழா வளாகத்தில் பரிசளிப்பு விழா நடைபெறும் என்று புத்தகத் திருவிழா ஏற்பாட்டுக் குழுவினா் தெரிவித்துள்ளனா்.