தூத்துக்குடியில் 620 போலி சிம்கார்டுகளை ஆக்டிவ் செய்த கடை உரிமையாளர் கைது

மத்திய தொலைதொடர்பு அமைச்சகம் (DOT & TRAI) அளித்த அறிக்கையில் கடந்த 2021 ஆம் ஆண்டில் தூத்துக்குடி மாவட்டத்தில் சுமார் 5000 சிம்கார்டுகள் போலியாக ஆக்டிவ் செய்யப்பட்டு உள்ளதாக விபரங்கள் அளித்திருந்தது. அதன் அடிப்படையில் விசாரணை மேற்கொண்டபோது, தூத்துக்குடி மேலசண்முகபுரம் பகுதியை சேர்ந்த வினோதினி என்பவர் அளித்த புகாரின் பேரில் தூத்துக்குடி சைபர் குற்றப் பிரிவு போலீசார் வழக்குபதிவு செய்து விசாரணை மேற்கொண்டனர்.

இதுகுறித்து தூத்துக்குடி மாவட்டக் காவல் கண்காணிப்பார் பாலாஜி சரவணன் உத்தரவின்படி, தூத்துக்குடி சைபர் குற்ற பிரிவு காவல்துறை கூடுதல் கண்காணிப்பாளர் (பொறுப்பு) கோடிலிங்கம் மேற்பார்வையில், சைபர் குற்ற பிரிவு காவல் ஆய்வாளர் சிவசங்கரன் தலைமையிலான தனிப்படை போலீசார் தீவிர விசாரணை மேற்கொண்டனர்.

விசாரணையில், தூத்துக்குடி பிரையண்ட் நகரை சேர்ந்த ராயன் (38) என்பவர் வெங்கடேஸ்வரா எண்டர்பிரைசஸ் என்ற பெயரில் தனியார் சிம்கார்டு டீலர்ஷிப் கடை நடத்தி வருவதும், இதன் மூலம் சுமார் 620 போலியான சிம்கார்டுகளை ஆக்டிவேசன் செய்துள்ளார் என்பதும் தெரியவந்தது.

மேலும், கடைக்கு ஜெராக்ஸ் எடுக்க வரும் நபர்களின் ஆதார் விவரங்களை பயன்படுத்தி பல போலியான சிம்கார்டுகளை ஆக்டிவ் செய்து உள்ளதும் தெரியவந்தது. உடனே, தனிப்படை போலீசார் ராயனை கைது செய்து அவரிடம் இருந்த 2 செல்போன்கள் மற்றும் 3 சிம்கார்டுகளையும் பறிமுதல் செய்தனர்.

மேலும், கைதான ராயனிடம் விசாரணை மேற்கொண்டதில், இதேபோன்று பல நபர்கள் செல்போன் டீலர்ஷிப் என்ற பெயரில் பொதுமக்களின் ஆதார் கார்டு மற்றும் புகைப்படங்களை பயன்படுத்தி, போலி சிம்கார்டுகளை ஆக்டிவ் செய்து உள்ளதாகவும், பல சட்டவிரோத செயல்களுக்கு அந்த சிம்கார்டுகளை விற்பனை செய்துள்ளதும் தெரியவந்துள்ளது.

போலி சிம்கார்டுகளை ஆக்டிவ் செய்த ராயனை கைது செய்து செல்போன்களை பறிமுதல் செய்த சைபர் குற்றப் பிரிவு போலீசாரை மாவட்ட காவல் கண்காணிப்பாளர் பாலாஜி சரவணன் பாராட்டினார். இதுதொடர்பாக மாவட்டக் காவல் கண்காணிப்பாளர் பாலாஜி சரவணன் வெளியிட்ட செய்திக் குறிப்பில் கூறி இருப்பதாவது:

மத்திய அரசின் https://tafcop.sancharsaathi.gov.in/ என்ற இணையதளம் மூலம் பொதுமக்கள் தங்கள் செல்போன் எண்களை பதிவு செய்து, தங்கள் செல்போன் எண்களுடன் எத்தனை போலியான செல்போன் எண்கள் இணைக்கப்பட்டு உள்ளது என்பதை தெரிந்து கொள்ளலாம்.

தங்களுக்கு தெரியாமல் கூடுதல் எண்கள் இணைக்கப்பட்டு இருந்தால் அந்த இணையதளம் மூலமே உடனடியாக அந்த செல்போன் எண்களை செயலிழக்கச் செய்ய முடியும். மேலும் பொதுமக்கள் ஜெராக்ஸ் எடுக்க கடைகளுக்கு செல்லும்போது, கடைக்காரர்களுக்கு வாட்ஸ்அப் மூலமோ, இ-மெயில் மூலமோ ஆதார் கார்டு போன்ற விவரங்களை அனுப்பும்போது, பிரின்ட் எடுத்த பின்னர் அவர்களிடம் உள்ள தங்களின் ஆவணங்களை அழித்துவிட்டனரா? என உறுதி செய்துகொள்ள வேண்டும் என்று மாவட்ட காவல் கண்காணிப்பாளர் பாலாஜி சரவணன் வேண்டுகோள் விடுத்துள்ளார்.