ஆதரவற்றோருக்கு தினமும் உணவு சம்மட்டி சமூக அறக்கட்டளை முயற்சி

தேனியில் உள்ள சம்மட்டி சமூக அறக்கட்டளை சார்பில் தினமும் ஆதரவற்றோருக்கு உணவு வழங்கப்பட்டு வருகிறது.

தேனியில் பர்னிச்சர் தயாரிப்பு நிறுவனம் நடத்தி வரும் சம்மட்டி நாகராஜ், மற்றும் தேனியில் உள்ள மதநல்லிணக்க குழு ஒருங்கிணைப்பாளர் முகமதுஷபி மற்றும் சில நண்பர்கள் இணைந்து சம்மட்டி அறக்கட்டளை நடத்தி வருகின்றனர். இந்த அறக்கட்டளை மூலம் தேனி பழைய பஸ்ஸ்டாண்ட் மற்றும் புதிய பஸ்ஸ் டாண்டில் உள்ள ஆதரவற்றோருக்கு தினமும் மதிய உணவு வழங்கி வருகின்றனர்.

தினமும் 50க்கும் மேற்பட்ட ஆதரவற்றோர் இதன் மூலம் பலன் பெற்று வருகின்றனர். இவர்களது சேவையை பாராட்டி பொதுமக்களும் தங்கள் இல்ல பிறந்தநாள், நினைவு நாள் மற்றும் திருமணநாள், திறப்பு விழா போன்ற நிகழ்ச்சிகளின் போது தங்களால் முடிந்த அளவு உதவிகள் வழங்கி வருகின்றனர். இந்த ஆதரவு தொடர்ந்தால், இந்த திட்டத்தை நீண்ட நாட்களுக்கு செயல்படுத்த முடியும் என மதநல்லிணக்க குழு ஒருங்கிணைப்பாளர் முகமதுஷபி தெரிவித்தார்.