களைகட்டும் சந்தைகள்.. ஒரே நாளில் ரூ.4. 5 கோடிக்கு ஆடுகள் விற்பனை

சேலம் மாவட்டம், எடப்பாடி அருகே உள்ள, கொங்கணாபுரத்தில், நேற்று சனிக்கிழமை வார சந்தை கூடியது. இந்த சந்தையில் சேலம், தர்மபுரி, கிருஷ்ணகிரி, ஓசூர், ஈரோடு, கோயம்புத்தூர். திருச்சி, உள்ளிட்ட மாவட்டங்களில் இருந்து சுமார் 5 ஆயிரத்திற்கும் மேற்பட்ட ஆடு, கோழிகள் விற்பனைக்கு வந்திருந்தன. சந்தை நடைபெற்ற ஒரே நாளில் ரூ.4. 5 கோடி அளவிற்கு வியாபாரம் நடைபெற்றுள்ளதாக வியாபாரிகள் சங்கம் சார்பில் தெரிவிக்கப்பட்டிருந்தது.

அதேபோல் சேலம் மாவட்டம், கொங்கணாபுரம் பகுதியில் செயல்பட்டு வரும் கூட்டுறவு வேளாண் விற்பனை சங்கத்தில் நேற்று பருத்தி ஏலம் நடைபெற்றது. இதில் விவசாயிகள் விற்பனைக்காக கொண்டு வந்திருந்த 5 ஆயிரத்து 750 பருத்தி மூட்டைகள் 1, 250 லாட்டுகளாக பிரிக்கப்பட்டு, கூட்டுறவு துறை அலுவலர்கள் முன்னிலையில் பொது ஏலம் விடப்பட்டது.

இந்த ஏலத்தில் பி.டி. ரக பருத்தி குவிண்டால் ரூ. 6 ஆயிரத்து 600 முதல் ரூ. 8 ஆயிரத்து 700 வரை விற்பனையானது. டி. சி. எச். ரக பருத்தி குவிண்டால் ரூ. 7 ஆயிரத்து 600 முதல் ரூ. 8 ஆயிரத்து 350 வரை விற்பனையானது. கொட்டு ரக பருத்தி குவிண்டால் ரூ. 3 ஆயிரத்து 600 முதல் ரூ. 5 ஆயிரத்து 500 வரை விற்பனையானது. 5 ஆயிரத்து 750 பருத்தி மூட்டைகள் மொத்தம் ரூ. 1 கோடியே 50 லட்சத்துக்கு ஏலம் போனது.