சேலத்தில் கோடைக்கால நீச்சல் பயிற்சி முகாம் ,1ஆம் தேதி முதல் தொடக்கம்

சேலம் மாவட்ட ஆட்சியர் பிருந்தாதேவி அவர்கள் கோடைகால நீச்சல் பயிற்சி குறித்த முக்கிய அறிவிப்பை வெளியிட்டுள்ளார், இதன்படி சேலம் மகாத்மா காந்தி விளையாட்டரங்கில் அமைந்துள்ள நவீன நீச்சல் குளத்தில் ஏப்ரல் 1 முதல் கோடைகால சிறப்பு நீச்சல் பயிற்சி முகாம் ஆரம்பமாகவுள்ளது. பயிற்சி முகாம் ஒவ்வொரு கட்டத்திலும் தொடர்ச்சியாக 12 நாட்கள் நடைபெறும் வகையில் திட்டமிடப்பட்டுள்ளது, ஒவ்வொரு நாளும் காலையில் 7:00 முதல் 8:00 மணி வரை, 8:00 முதல் 9:00 மணி வரை, 9:00 முதல் 10:00 மணி வரை என மூன்று நேர அமர்வுகளும், மாலையில் 3:00 முதல் 4:00 மணி வரை, 4:00 முதல் 5:00 மணி வரை, 5:00 முதல் 6:00 மணி வரை என மூன்று நேர அமர்வுகளும் என ஒவ்வொரு அமர்வும் ஒரு மணி நேரம் வீதம் நடைபெறும். நீச்சல் பயிற்சி முகாம் ஐந்து கட்டங்களாக பிரிக்கப்பட்டுள்ளது, முதல் கட்டம் ஏப்ரல் 1 முதல் 13 வரையும், இரண்டாம் கட்டம் ஏப்ரல் 15 முதல் 27 வரையும், மூன்றாம் கட்டம் ஏப்ரல் 29 முதல் மே 11 வரையும், நான்காம் கட்டம் மே 13 முதல் 25 வரையும், ஐந்தாம் கட்டம் மே 27 முதல் ஜூன் 8 வரையும் நடைபெறவுள்ளது. இந்த நீச்சல் பயிற்சி முகாமில் பெண்களுக்கென தனியாக காலை 9:00 முதல் 10:00 மணி வரையும், மாலை 5:00 முதல் 6:00 மணி வரையும் பயிற்சி நேரம் ஒதுக்கப்பட்டுள்ளது, ஆனால் மற்ற நேரங்களில் சிறுவர் மற்றும் சிறுமிகள் இருபாலரும் நீச்சல் பயிற்சி பெறலாம். நீச்சல் குளமானது ஒவ்வொரு வாரமும் திங்கட்கிழமை அன்று பராமரிப்பு பணிகளுக்காக மூடப்பட்டிருக்கும். ஒவ்வொரு கட்டத்திற்கும் 12 நாட்களுக்கான பயிற்சிக் கட்டணம் 1,500 ரூபாய் மற்றும் அதனுடன் 18 சதவீத ஜிஎஸ்டி வரி சேர்த்து மொத்தம் 1,770 ரூபாய் ஆகும். பயிற்சிக் கட்டணத்தை www.sdat.tn.gov.in என்ற அதிகாரப்பூர்வ இணையதளம் மூலமாகவோ அல்லது ஏ.டி.எம். கார்டு, ஜி-பே, போன்-பே போன்ற டிஜிட்டல் முறைகள் மூலமாகவோ செலுத்தலாம், ஆனால் ரொக்கமாக கட்டணம் ஏற்கப்படமாட்டாது என்பதையும் மாவட்ட ஆட்சியர் தெளிவுபடுத்தியுள்ளார்.