மாநில அளவிலான தடகள போட்டிக்கு மயிலாடுதுறையில் வீரர், வீராங்கனைகள் தேர்வு

மயிலாடுதுறையில் ராஜீவ்காந்தி சரக சாய் விளையாட்டு மைதானத்தில் மாநில அளவிலான தடகளப் போட்டியில் பங்கேற்க வீரர், வீராங்கனைகள் தேர்வு நடைபெற்றது. இந்த போட்டியில் நாகை, மயிலாடுதுறை மாவட்டங்களை  சேர்ந்த 14, 16, 18 மற்றும் 20 வயதிற்கு உட்பட்டோர் என்று நான்கு பிரிவுகளில் தடகள போட்டிகள் நடைபெற்றன. இதில் தேர்வு செய்யப்படுபவர்கள் 8-ஆம் தேதி திண்டுக்கலில் நடைபெற உள்ள மாநில போட்டியில் பங்கேற்க தகுதி பெறுவர்.

மாவட்ட தடகள சங்கத் தலைவர் ரவிச்சந்திரன், செயலாளர் செல்வகணபதி மற்றும் பள்ளி உடற்கல்வி ஆசிரியர்கள் பங்கேற்று தேர்வினை நடத்தினர். இதில், 100 மீட்டர், 200 மீட்டர், 600 மீட்டர், 1500 மீட்டர் ஓட்டப்பந்தயங்கள், நீளம் தாண்டுதல், வட்டு எறிதல், குண்டு எறிதல் உள்ளிட்ட பல்வேறு போட்டிகள் நடத்தப்பட்டு மாணவர்கள் தேர்வு செய்யப்பட்டனர். 120 வீராங்கனைகள் உள்பட 400 பேர் பங்கேற்ற இப்போட்டிகளில் முதல் இரண்டு இடங்களை பிடித்த 50 வீரர்கள் தேர்வு செய்யப்பட்டு, மாநில போட்டிகளுக்கு அனுப்பப்பட உள்ளனர்.